A Codroip in Otubar “La presince assente. Pensâ Franco Marchetta, tal Friûl di vuê”, une riflession su culture, lenghe e societât

Un grant grup di amîs di Franco Marchetta, il scritôr codroipin mancjât intal mês di Mai di chest an a dome 62 agns, si è dât l’impegn morâl di lâ indevant a disvilupâ lis tantis ideis, fertilis e inovativis, che Marchetta al veve semenât in dutis lis direzions plui interessantis e creativis dal scrivi par furlan e par talian.
Soredut intai ultins agns, di fat, la ativitât inteletuâl di Franco e veve savût cancelâ ogni bariere di etât, formazion, interès, espressions artistichis diviersis, par tocjâ invezit di dongje tantis personis impegnadis in tantis diviersis esperiencis sul teritori furlan. Cuasi teorizant la “co creazion” coletive dal test leterari, Marchetta dispès al meteve tra parentesis la proprie creativitât par fâ cressi invezit un lavôr di grup bon e fertil.
I amîs no àn volût abandonâ il ricuart a se stes ma – invezit di alçâ sù dibant “monuments” – a àn preparât une serie di iniziativis, dutis ospitadis a Codroip, “lûc dal cûr” par Franco Marchetta, in graciis de disponibilitât gjenerose dal Comun, cul contribût economic determinant di Provincie e ARLeF.
Vinars ai 17 si scomence, aes 21, intal teatri Benois De Cecco, cu la leture seniche di un test teatrâl inedit di Marchetta, “La nebbia”, introdot di Anna Gubiani e Alessandro Di Pauli. Sul palc, Giuliano Bonanni, Fabiano Fantini, Giorgia Marchetta, Daniel Samba, Massimo Somaglino.
Sabide ai 18, aes 21, in biblioteche, un “talk show” condusût dal gjornalist Paolo Medeossi al aprofondirà i temis plui leâts aes oparis leterariis, sedi par furlan che par talian: a fevelaran Salvatore Errante Parrino, Angela Felice, Paolo Patui, Federico Rossi, Walter Tomada, Mario Turello, Andrea Valcic. A leiaran i tescj di Franco Marchetta Gianmaria Marchetta, Giorgia Marchetta e Giacomo Trevisan.
Domenie ai 25, aes 21, tal auditorium comunâl, conciert dai “Carnicats” (DJ Deo, Doro Gjat, Dek “ill Ceesa”) cun intervents in direte dal web di Gianmaria Marchetta e Giacomo Trevisan.
E, par concludi, martars ai 28, aes 20, di gnûf in biblioteche: dilunc de cerimonie di premiazion, leture di tocs di oparis leterariis in lenghe furlane cun Umberto Alberini e Alberto Soramel.❚
✒ Umberto Alberini