EDITORIÂL – Un referendum cuintri lis nestris divisions

✽✽ Par un moment, fasìn finte di jessi tornâts frutins, di lâ indenant cence tancj prejudizis tal cjâf, e fasìn chel zûc dulà che si scuen, cuntun lapis, lâ daûr ai puntins numerâts: ae fin e salte fûr une figure.
Po ben, partìn dal prin e lu clamìn “furlans”.
✽✽ O vin simpri dite che o sin un popul, segnât di une sô storie, di une sô lenghe, di une sô culture. Chestis carateristichis, metudis jenfri un contest fisic, gjeografic, politic clâr e net tant che il nestri, nus àn puartâts a definîsi nazion: la nazion furlane, juste apont. Anìn indenant cul lapis, e viodìn che nol è avonde definîsi, se po dopo a cheste definizion no i corispuint une rapresentazion istituzionâl direte: o sin une nazion cence stât. A dîle dute, o sin une nazion intun altri stât, la Italie.
✽✽ Cualchidun al pense che e sedi rivade la ore di rompi cheste situazion e che la uniche strade e sedi chê de indipendence dal stât talian. Duncje al à metût in vore un referendum in rêt par viodi cui che al è dacuardi su cheste idee. Il program, cui che a son e ce che a pensin i promotôrs, e ancje tocs de lôr vite, a son sul numar di Setembar dal gjornâl.
✽✽ O vin di jessi clârs su chest: la situazion li che si cjate il Friûl e je chê che a disin lôr. No dome: e je chê che ducj i furlans – che si clamin autonomiscj, furlaniscj, indipendentiscj o cemût che o vês voie – a stan disint di simpri.
Cumò si scuen fermâ il lapis, par decidi se lâ indenant o fermâsi. Ce isal saltat fûr fin cumò dal nestri dissen? Dome veretâts, robis che o savìn di simpri, che tancj furlans a àn provât a sburtâ sul plan de cussience e des lotis.
✽✽ Ce podaressial fermâ la nestre man? Cualchidun lu a bielzà dite: no i plâs che il referendum al sedi poiât de Leghe. Di sigûr, ancje cu la elezion dal triestin Fedriga a segretari regjonâl, cu lis ambiguitâts e lis posizions dal Cjaruç, i dubis su ce che al reste di furlan te Leghe a son ducj. Ma si puedial dî di no a di un partît se il referendum, par sô stesse nature, si vierç a ducj?
✽✽ Altris a àn pôre di jessi metûts in bande. Si son simpri declarâts indipendentiscj, ma cumò, viodût che no son lôr a gjestî lis robis, si tirin indaûr cu la scuse che no son madûrs i timps. Po dopo, a rivin chei che a fevelin dome par fâ viodi che a son ancjemò vîfs, dal pont di viste anagrafic e no dal sigûr politic.
✽✽ I dubis a àn simpri di jessi rispietâts, par altri no àn di puartâ aghe a chei che a àn simpri dite “Cjalait i autonomiscj furlans che no si metin mai dacuardi”.
✽✽ Jo o disarès duncje che o podìn lâ indenant cul nestri lapis. Al sarès dibant fevelâ tant di Scozie o di Catalogne se no si scomence a mostrâ la muse.
✽✽ Il referendum al va indenant fin ae fin di Otubar. In trops che a votaran e je la vere vitorie o la disfate de consultazion. E no volarès mai che la dì dopo, i talianots e i lôr servidôrs a fasedin fieste ancjemò une volte su lis division e il sotanisim dai furlans. ❚
DREE VALCIC