Stelis par Avostanis 2014

Fridrì dai Ros al è solit “zuiâ” la sô briscule plui pesante cun Avostanis, chest an, lu savin, al à radoplât il so impegn, cjapant su la direzion dal Mittelfest di Cividât. Un dopli front che al decline ai verps di passion e sensibilitât. In chest toc o fevelarìn di Avostanis, apontament tradizionâl, forsit mancul businât dal Mittelfest, ma no mancul preseât e preziôs, no fossie par vê il coraç e la volontât di metilu inte svuaze di un dai tancj paisuts de plane furlane, un dai esperiments rivâts a jessi di cualitât cence vê par fuarce il lustri des grandis citât. Pensìn dome a Topolò, par fâ un esempli in plui. Un piçul che si relazione cul mont, e par piçul o feveli dome di dimension, no di cualitât.
Il sproc di Victor Hugo che al fâs di sot titul al è une vore sugjestîf e al claris subit cuâl che al sarà il fîl ros di Avostanis 2014: “Intun cîl di gnot cualchidun al viôt dome il scûr, jo o ai miôr contemplâ lis stelis”. Une serie di apontamets che a metin adun culture e capacitât di lei la realtât che o vivìn ator di nô. Un pont di riflession che al cor in bande al dibisugne di tornâ a cjatâ un pont di partence che al judi a dâ lis coordenadis intu mont simpri plui dificil di rivâ a lei pai tancj segns che si zontin in chescj timps. Il centri dai Colonos, di simpri, al è plantât te storie e te culture furlane, cu la tendice a vierzisi al mont, a confrontâsi pui tost che sierâsi. Al cjape subit il voli il titul: Hax Pax Max che lassin induvinà i pui curiôs il so significât, magari continuant a tignî presint Victor Hugo. La crisi che o vivìn si rint presinte ancje tes sieltis dal program, indulà che si son cirudis soluzions che a àn spiçât l’ingegn cence gjavâ nuie ae espression culturâl di cualitât. A son presints dibatiments, laboratoris, mostris, cines, concierts e teatri. Il program al è disponibil sul sît www.colonos.it, ma par chei che no matein masse cu la Rêt al val la pene dî alc in plui. Par esempli la serade di Philippe Daverio ai 18 di Avost che a puarte il titul di: “La creativitât nus salvarà”; o ancjemò il concors In trê Riis, indulà che la capacitât di fâ struc de lenghe furlane e mostre la sô modernitât ai timps dai sms; o ancjemò lis Provis viertis di culture furlane, laboratori creatîf e di confront di progjets za inviâts e di inviâ tal ambit de culture. No si pues citâ ducj, ma dome dâ une cerce. La gjostre de culture che e zirarà ator dai Colonos a Vilecjasse e à scomençât a zirâ miercus ai 30 di Lui, par finî martars ai 2 di Setembar.
O crôt che fevelâ di culture nol sedi fûr lûc tune ete di crisi cussì profonde, parcè che nus sburte a cjalâ plui in là dal nestri nâs, magari cussì no, plui in là de fumate che nus plate la prospetive, discuvierzint cui che o sin (limits e pussibilitâts) par trasformâsi in alc di plui.
O conclût cuntun tocut di Nietzsche che al fevele de crisi in maniere esistenziâl e propit par chel cence timp o confins: “I vûl il caos dentri di se par parturî un lusôr di stele che si môf”.
Li dai Colonos lis stelis no mancjin… ❚
Mauro Della Schiava