Juste cuarante agns indaûr un document di un trop di predis al palesave il disacuardi cu la decision dal Arcivescul Battisti di improibî la celebrazion de messe par furlan. Ches at al fo la nassite di “Glesie Furlane”, une des espressions principâls – se no chê principâl – de vite eclesiâl furlane.
Dilunc des vicendis storichis, si presentin situazions ordenariis, in dut e par dut similis a tancj altris ats, ma che a cjapin un significât speciâl: la presentazion di bande di un rigorôs munic agostinian di 95 tesis teologjichis – procedure solite te universitât di chel timp – e fasè svoltâ in maniere epocâl lis vicendis no dome religjosis de Europe moderne, tant che la vilie de fieste dai Sants dal 1517 e je deventade no dome la frontiere tra dôs etis, ma ancje l’inizi di chê che o sin usâts a definî la “modernitât” religjose. No vin di vê pôre di paragonâ lis vicendis dal nestri microcosmi furlan cun events ben plui clamorôs: ai 28 di Avost dal 1974 – juste cuarante agns indaûr – un trop di predis cjargnei al lassave sul altâr de Prepositure di Sant Pieri un document curt dulà che al jere palesât il disacuardi cu la decision dal Arcivescul Battisti di improibî la celebrazion de messe par furlan. Intune esegjesi rigorose al test dal Bon Pastôr dal cjapitul X dal vanzeli di Zuan – “lis pioris a scoltin la sô vôs” – chei predis a rivendicavin il dirit di doprâ il furlan te liturgjie, sore dut parcè che “la lenghe e pant un mût di pensâ, di resonâ, di vivi. E je une espression di dute la vite di un popul, presint e passade“. Chê date, par convenzion, e je stade individuade, cun buine reson, tant che moment de nassite di Glesie Furlane, une des espressions principâls – se no chê principâl – de vite eclesiâl furlane. Formade di predis e di laics – in adesion al detât conciliâr che al dîs che la Glesie e je fondamentalmentri “Popul di Diu” – chel moviment al à segnât par cuasi mieç secul la interie vite furlane, tai siei aspiets plui particolârs, sostignint lis bataiis plui iluminadis pal ricognossiment de proprie identitât, intindude no intun sens esclusîf (furlans si è par vocazion – come che e certifiche la nestre tormentade storie di invasions, sorestants forescj, presincis di isulis aloglotis di talians, slovens, todescs –, no par jus sanguinis o jus soli), ma intun sens ospitâl e inclusîf, che al rapresente la maniere plui razionâl par frontâ cun dicerniment i procès invasîfs di globalizazion e massificazion. Ilustrade di personaçs di prin plan de culture furlane tant che pre Checo Placerean e pre Toni Beline, Glesie Furlane si è inlidrisade simpri plui tal profont te nestre storie: tant che unic esempli, mi limiti a ricuardâ chel straordenari coinvolziment tal procès di ricostruzion dal Friûl taramotât, un autentic “rinassiment” materiâl e spirtuâl alimentât de coralitât de partecipazion popolâr. Dongje dai grancj events, al sta però l’impegn costant tal cuotidian, come che a certifichin i regolârs incuintris culturâi e eclesiâi te Plêf di Vençon e la ativitât cence padin de produzion librarie, coronade cul dâ inizi a la straoredenarie Opera omnia di pre Beline. Dut câs cuarante agns a son une etât critiche, chê dulà che, vignint mancul lis fuarcis dopradis fin chi par rompi la tiere tal Vignâl dal Signôr, al è necessari proviodi di cirî gnûfs operaris, di ripensâ in maniere critiche i obietîfs dal nestri operâ intune societât simpri plui conformiste e consumiste, di superâ l’individualisim che al è daûr a copâ no dome lis nestris comunitâts, ma ancje lis nestris plebes – ce tant indicatîf che in Friûl lis parochiis a vedin il non de int puare, de plebs! –, ma chest, mi auguri, al sarà il compit che o vin di puartâ indevant pai prossims dîs agns, par celebrâ cun gjonde il cincuantenari. ❚ Remo Cacitti
