TERITORI – Zefferino Tomè, un pordenonês furlanist e autonomist

Descrivi in curt ce che il Senatôr Tomè al à fat pal Friûl al è impussibil: cul jutori dal fi Riccardo o ai cirût di meti in struc i cjapitui plui impuartants de sô vite, dedicade a la int furlane.
Zefferino Tomè, nassût a Cjasarse tal 1905, al è stât une des figuris plui ativis e dispès plui determinantis te storie resinte dal Friûl, e di chê provincie di Pordenon che lui al à tant volude.
IN ROTURE CUL FASSISIM_ Daspò jessi deventât avocat, al tache a praticâ a Pordenon ma tal 1931, in rotis cul regjim fassist che al à disfat lis Associazions Catolichis, al va incuintri a dificoltâts. In chel periodi, tal so studi al tire adun i siei amîs dal ex Partît Popolâr e in stret leam cul grup di Udin – in particolâr cul avocat Agostino Candolini, che tal so studi al à fat pratiche Tiziano Tessitori, il pari de regjon a statût speciâl – , al invie la rinassite dal partît.
Fondadôr dal Comitât di Liberazion Nazionâl, «Fischio» al opare tant che organizadôr de resistence di planure e tant che poie dai grups osovans (laics, liberâls, socialiscj e catolics) nassûts tes vals dal Friûl ocidentâl.
FONDADÔR_ Tai dîs de Liberazion al devente sindic comissari dal Comun di Cjasarse, che cun lui al ven traghetât viers une rinassite dal daspovuere. Grant amì e paisan di Pier Paolo Pasolini, cun lui al è jenfri i fondadôrs dal Moviment Popolâr pe Autonomie regjonâl dal Friûl, di simpri un dai siei balins e albe di dute une schirie di iniziativis a caratar autonomist. Tal manifest costitutîf dal moviment a vegnin canonizâts principis e fondis di un sintiment e di une intenzion che, a lei ben, a son cetant di atualitât: Compit dal Moviment Popolâr Furlan al è chel di unî, adalt di ogni partît, dutis lis fuarcis, fin in dì di vuê sparniçadis, di chei che intes autonomiis regjonâls a viodin la uniche garanzie di libertât democratiche. Ogni furlan che al dei la poie cui siei conseis e la sô opare a chest moviment che al dovarà jessi la plui gjenuine espression de nestre volontât popolâr. Chest manifest iluminant al puartave la firme di Gianfranco D’Aronco, Vigji Ciceri, Chino Ermacora, Sandri Vigevani, Vigji Pettaria, Tilio Venudo, Pier Pauli Pasolini e Zefferino Tomè.
FRIÛL STORIC_ Elet senatôr de republiche (dôs legjislazions), riclamantsi al Friûl storic si dopre prime pe autonomie regjonâl – in contraposizion cun chei che a volevin il Friûl tant che provincie slargjade dal Venit – e daspò pe istituzion de provincie di Pordenon. Un lavôr lunc chel dal senatôr Tomè, che al presente un dissen di lec ben fat ma leât, pe sô fatibilitât, a un statût regjonâl vincolât aes decisions dal tratât di Londre (cuant che Triest al torne talian).
I impegns politics che Tomè al cjape a son cetancj e ducj a vegnin di une sensibilitât particolâr pe sô tiere, pe sô storie e pe sô int. Tal 1958, dutune cul onorevul Bearzati, sfrutant un dissen di leç fat pes zonis depressis, al fonde il Medio Credito del Friuli Venezia Giulia, un ent che – domandant garanziis minimis – al varès dât fuarce aes piçulis ativitâts industriâls furlanis a pene nassudis, e creât oportunitâts di lavôr pe int che fin in chel moment e veve tant che uniche prospetive dome chê de emigrazion. Il disvilup conseguent dal setôr produtîf al puartarà a une cessazion progressive dal fenomen migratori.
OM DI COERENCE_ Tal 1960 Zefferino Tomè al devente president dal ospedâl di Pordenon, che sot la sô direzion al ven modernizât e al devente il baricentri de sanitât de gnove provincie.
I oms di fuarte sensibilitât umane a lassin simpri segns impuartants te vite de comunitât e Tomè, cui siei ideâi, salacor al rive a segnâ la storie plui di altris. Di sindic di Sant Vît al Tiliment al devente promotôr de nassite dal Istitût psicopedagogjic La nostra famiglia li che si curin fruts cun problemis di deficit fisics e inteletuâi.
Om di fevele clare e di mediazion nobil, al à simpri doprade la coerence tant che metodologjie par frontâ lis decisions politichis.
Alex Olivetto
______________________________
Zefferino Tomè su cjarte
Par cognossi di plui vite e spirit di un om dotât di dedizion particolâr pal impegn in politiche e pal teritori, ma ancje par la scriture, frut di studis classics e di une indole a vocazion artistiche, si pues conseâ trê libris:
ZEFFERINO TOMÈ. Vita di un senatore nel Friuli della rinascita (scrit da Stefano Polzot – edizioni L’Omino Rosso 2008);
NEL CORSO DEL TAGLIAMENTO. Vita del sen. Zefferino Tomè e vicende della sua terra (scrit da Riccardo Tomè – Editoriale Pordenone 2002, Euro 92);
TOMÈ (FISCHIO) NELL’OSOPPO FRIULI con Ricordi di un Osovano di Zefferino Tomè (scrit da Riccardo Tomè – Editoriale Pordenone 2003, Euro 92).
(S. Ol.)