AUSTRIE. Vitorie pe tolerance in Europe: il sucès di “Wurst” al sburte a une gnove discussion sul teme dai dirits des cubiis omosessuâls

Il vincidôr dal »Eurovision Song Contest« di chest an al è stât, denant di 180 milions di spetatôrs di 45 paîs, Conchita Wurst, cognossût tant che “femine cu la barbe”, che e je l’alter ego dal cjantant travistît austriac Thomas Neuwirth.
Il Ministri de Culture austriac Josef Ostermayer al à dit che il risultât al è une vitorie pe tolerance in Europe. Pe Austrie e je la prime vitorie tal Song Contest dopo dal 1966, e la seconde assolude te storie de competizion che si ten dal 1956. Daûr la tradizion, l’an che al ven la Austrie e organizarà il prossim event, probabilmentri a Viene.
Cui si platial daûr la figure?
Thomas Neuwirth, nassût ai 6 di Novembar dal 1988 a Gmund, al cres in Stirie a Bad Mitterndorf, paîs di 3.000 animis. A 14 agns al scuvierç di jessi diviers, però dome cuatri agns dopo al decît di confessâ la proprie omosessualitât ai siei gjenitôrs. Al decît di scjampâ de provincie par lâ tal cjâf lûc anonim Graz, dulà che al frecuente la scuele di mode.
Za tal 2006, ancjemò arlêf de scuele, al partecipe in television al talent show »Starmania« de ORF (radiotelevision nazionâl austriache), dulà che al concuiste il secont puest. Un an daspò, al fonde la boyband »Jetzt anders!«
***
Il personaç di fantasie “Conchita Wurst”
Conchita Wurst si presente tant che une dive cu la barbe. La biografie romanzade e tache tes monts de Colombie e e puarte a une infanzie in Gjermanie, fin ae cariere tant che cjantant in Austrie. La sô creazion, al spieghe Neuwirth, e je une rispueste cuintri la discriminazion dai zovins a cause de lôr omosessualitât. Il sorenon »Wurst« al vûl dî »luianie« o »salam«, però in sens figurât ancje »no mi impuarte« o miôr: no mi impuarte il to aspiet e di indulà che tu vegnis. Soredut par vie de barbe, Wurst si distache di altris figuris di travistîts. Di fat, si trate di un omp-femine, un mix di gjenars cul motîf di provocâ.
***
Neuwirth si è presentât pe prime volte in chest rûl al grant public tal 2011 tant che partecipant al spetacul di talents »Die große Chance« de ORF, finint al sest puest tal round finâl.
Tant che Conchita Wurst al è rivât tal Song Contest 2012 austriac al secont puest. Tal Setembar dal 2013, la television statâl austriache e decît di mandâ Conchita Wurst tant che rapresentant de Austrie. La cjançon »Rise Like a Phoenix« e je stade presentade pe prime volte ai 18 di Març dal 2014 su la radio Ö3.
***
Cul sucès di Copenhagen, »Wurst« al è rivât adore a sburtâ une gnove discussion sul teme dai dirits des cubiis omosessuâls. Cumò ancje il partît popolâr conservadôrs al è pront pes riformis de legjislazion a pro dai dirits dai omosessuâi, e a movisi te cuistion dibatude de adozion di fruts.
Un teme dificil dulà che la grande coalizion no presente une linie clare: la SPOE e vûl riformâ, la OEVP – cumò costrete a movisi daûr la opinion publiche – e je pronte a discuti; mentri che e je cuintri la diestre populistiche FPOE.
Il teme, in gracie dal sucès, al è tornât tes primis pagjinis tai media; e se i media si ocupin di alc, i politics no lu puedin ignorâ, soredut tal mieç de campagne eletorâl pe Europe.
Però no stin a dismenteâ che prin dal sucès diviers politics – soredut de diestre popolâr ma ancje altris personaçs publics – a vevin criticade la figure di »Wurst«, disint che no jere degne di rapresentâ la Austrie; anzit, a fevelavin di un insult pe imagjin de Austrie simpri corete e nete.
Midiant di »Wurst«, ancje i conservadôrs – fin tal ultin dai cjantons plui piçui – a tachin a discuti lis cuistions leadis ae omosessualitât: salacor, un prin pas viers un aiar plui tolerant. Alc si è za movût, e di chel trend positîf che si sint pardabon dapardut e a ogni pas, a puedin ancje profitâ chês altris minorancis. ❚
Janez Erat