In biciclete cui Gnognosaurs i fruts a van vie in sigurece

«Âstu volût la biciclete? Cumò no stâ  a fâ il gnogno» al è un librut cu lis istruzions par lâ in bici in sigurece realizât par cure de Promozion de Salût dal Dipartiment di Prevenzion de ASS 5 Basse Furlane di Palme cu la poie de leç 482/99. Lis regulis lis spieghin i Gnognosaurs, i dinosauruts dordei che fevelin furlan creâts di Dree Venier. I tescj a son par furlan e par talian, ma cu la marilenghe ben plui in evidence, e cul talian metût in forme di traduzion dal test principâl. Il contignût tecnic al è par cure di Silla Stel, ma al ven spiegât traviars lis batudis (tescj di Elisabetta Pittana) e i dissens, il dut leât di une filastrocje di Graziana Ciani. Meti il casc, tignî la drete, impiâ lis lûs di sere: dutis lis regulis par lâ in bici idi mût di no fâsi mâl e no fâ mâl. Une iniziative che la ASS 5 e veve fate une compagne – doprant i Gnognosaurs e cul furlan grant protagonist – pe prevenzion dai infortunis in cjase e che e veve vût grant sucès. Cumò si repliche e il gnûf librut al risulte divertent e util come il prin. Come chel altri, chest al è un librut par piçui, ma che al podarès jessi util ancje ai grancj: dopo vêlu let si pues rindisi cont che ognun di nô nol va ator in biciclete propit benon… Util e divertent: brâfs! ❚
✒ Redazion