Udin par furlan

Assessore Antonella Nonino, al somee pardabon che a Palaç D’Aronco e sedi rivade, biadelore, une svolte furlaniste. O vês une schirie di events, o stampais i manifescj bilengâi, un sportel simpri operatîf. Ce isal sucedût?
Ah, sì? A mi mi somee che al sedi dut in continuitât. L’assessôr Franzil, che al veve competence su lis lenghis prime, al à inviât un discors. Jo o soi lade indenant. Ma soredut: nô i crodin. I crôt jo, i crôt Honsell e dute la zonte i crôt su cheste teme. O disarès che vuê o vin volût dâ il sburt di plui su cheste teme de comunicazion, par vie che chês impuartantis che a jessin dal Comun a sedin bilengâls.
L’intindiment al è clâr e al passe ancje fûr. Te zonte “Honsell 1” alore alc nol jere clâr…
Dome cuistion di timp. Jo ai vude la fortune di scomençâ l’assessorât cuntun pont za segnât di Franzil: la viertidure dal sportel. Jo i ai dade la acelerade, ma la benzine mi le à metude lui.
La Zonte in chest ise un bloc unic?
O vin fate une riunion cun ducj i assessorâts, il sportel e o vin condividût une idee de lenghe: chê che e no à di jessi considerade tant che sierâsi, difindisi di altris culturis; pluitost, viertidure dal pont di viste turistic, culturâl e valôr economic. Lenghe e culture intune otiche di produtivitât. Te Patrie dal Friûl dal 1077 e funzionave cussì. Udin al veve une capacitât di jessi multi-culturâl za in origjin.
Pussibil che nissun tal vuestri centri-çampe si “susti” pal masse spazi dât al furlan?
Se o proponìn une vision de lenghe stîl “Braveheart”, o sarès la prime a dî “vonde”. Ma se lui al fos lât a S. Svualt al teatri Menossio, pe 47/esime Rassegne di teatri furlan, al viodeve il teatri plenon. La int nus domande une valorizazion vere, no une difese cuintri ducj e cuintri dut. Culì, un si pues sustâ se o vin une valorizazion là che si fevelìn dome fra di nô. Ma, parcè?… lui aial cualchi sentôr che no ducj sedin dacuardi?
No: ma saial il centri çampe al à tantis animis. Tal Pd, che al è un dai vuestris aleâts, par esempli, al esist un front cuintri dal furlan.
Ah, be… in chel câs, la veretât e je che… ur bruse.
Ur bruse?
Ur bruse che il teme ur sedi stât puartât vie de Leghe Nord. Sicome che il furlan al è deventât une bandiere politiche dome di une bande o crôt che chê altre bande si ribele. Cheste e je la sfide: nô o vin di fevelâ dal furlan come di une specialitât cence frazionaments, metint di bande il teme identitari di une part politiche. Se no il riscjo al è che a lassin ae Leghe di fevelâ dal furlan, cuant che a son i ultins che a varessin di fevelâ, viodût che si dismentein dal multiculturalism dal Friûl di îr. E di chel di vuê.
Par esempli, in Consei comunâl cul rapresentant de Leghe cjataiso un intindiment sul furlan?
Il pont al è cjatâ une convergjence il plui pussibil, ancje cun altris. In Consei, nô o vin Pittoni che par esempli al è un conseîr che nol è un che al pense che cheste teme e sedi sô e dome sô, in maniere esclusive. Magari al sint plui cierts temis, come chei de autonomie, considerant ancje altris incarics che al veve vût in passât. Sul furlan o ai vût bon acet ancje in Provincie, par dî.
Di Palaç Belgrât?
Lì al è evident che il teme al è tant fuart e tant sintût. Ma onestementri: no sin in concorince, pluitost la lenghe e à di sburtâ la voie di cressi tai intindiments comuns viers il Friûl.
Par esempli, cuâi?
Cumò o vin la cuistion de specialitât. Lassìn daûr lis fragmentazions, che a fasin some pierdi tant timp e rivìn ae conclusion che dome insiemit si pues sei une fuarce. ❚
Oscar Puntel