ATUALITÂT – La Pimpa e insegne il furlan ai frutins

Cuâl frut no aial mai viodude la Pimpa, une cjiçute blancje cun tantis maglis rossis, tant che i nestris piçui a podaressin pensâ che e vedi il varuscli? Ma la Pimpa, simpri cu la lenghe di fûr, e je masse simpatiche, no pues no tirâ la simpatie di grancj e di piçui! E nuie varuscli, trancuii: e je biele cussì, no mo? Cun di plui, la cjiçute blancje e rosse e je nassude dal gjeni di un ilustradôr furlan, l’innomenât Francesco Tullio Altan, che al à inventât ancje un personaç unic tant che il «mitic» operari metalmecanic Cipputi. Nassude tal lontan 1974, e dal an dopo jessude su lis pagjinis dal Corriere dei Piccoli, dopo vê fevelât par talian (e cun di plui par inglês) e je rivade la ore di podê lei lis contis de Pimpa ancje te sô lenghe mari, juste apont par furlan. I frutins siei passionâts a podin cjatâ cumò la lôr eroesse ancje su cuatri libruts a pene jessûts par cure dal «Istitût ladin furlan Pre Checo Placerean» e dal sît internet «Lenghe.net»: si trate di volumuts de golaine «Imparelibris», indreçâts ai frutins des scuelis de infanzie, voltâts dal origjinâl talian di bande di Anna Bogaro e di William Cisilino, in colaborazion cu la cjase editore Franco Cosimo Panini e la Quipos.
I titui, i tescj e lis imagjinis, viodût che si trate di stampe par frutins, a son une vore sempliçs e clârs. Par imparâ cemût che si clamin i ogjets che si doprin ogni dì ve ca «Pimpa e lis robis»; par savê invezit cemût che si podin doprâ chestis robis al è «Pimpa e je in vore». I colôrs po… i colôrs dai fumuts de Pimpa a son nets, cence masse sfumaduris e a tirin di colp la atenzion dai fruts: par insegnâur miôr chest cantin al è «Pimpa e i colôrs». Il cuart e ultin (pal moment) librut al fevele di «Pimpa e i numars»: forsit un doman ai piçui dal dì di vuê che a varan pes mans chest volumut no ur plasarà masse la matematiche, ma par intant si va trancuii cu la Pimpa fintremai al numar 9…
I cuatri libruts, che a costin 4 euros e mieç dal un, a son stâts presentâts ai 21 di Març stâts li de Cjase Turoldo a Coder di Sedean. Presint ancje il stes Altan, che al à ricuardât cemût che la cjiçute blancje e rosse e je vignude fûr de sô matite cuant che sô fie e veve doi agns, e e puarte il non di une amie di famee. Dopo lis trasmissions de Rai regjonâl, li che i fumuts de Pimpa a son stâts dopleâts in marilenghe, cumò la creazion di Altan e rive drete tes scuelis par sostignî la alfabetizazion par furlan dai plui piçui.
Par informazions scrivêt ae direzion: istitutladinfurlan@libero.it.
___________________________
La maiute
Un goloseç par pôcs, aromai, stant che e jere a numar limitât. Intal 1999 e fo produsude une maiute cuntun disen di Altan e une frase par furlan: une frute cul megafon (dissen ca parsore) che e diseve «Co une lenghe e je piçule e va doprade a fuart». La ocasion e jere il stand Eurolenghis dentri dal salon dal libri di Pordenon, in chei timps che e jere une biele presince dal furlan in chê fiere.
ALESSIO POTOCCO