Dôs zimulutis a inluminin Stele

Cuant che si cjale a nord di Tarcint viers de golaine di monts che i stan daûr, no si pues fâ di mancul di viodi une glesie rimpinade insom di un çuc. E somee peade cuntun fîl al cîl che i sta disore, ma in realtât e je il segnâl de presince di une umanitât che no à voie di sbrissâ jù inte valade. La gleseute di Stele une volte no faseve nissune fature a jemplâsi: in chest borc parsore de valade de Tor e jere parfin une scuele, e chest al fâs capî cetancj che a jerin i fruts che a vivevin ca sù. Tantis fameis a vevin la oportunitât di lavorâ intal Cascamifici di Bulfons, juste dapît de mont: ma une volte rivât il benstâ la int e à scomençât a lâ a vivi inaltrò. Plui comut: ma pal paîs al è stat l’inizi di un Calvari, che al à disvuedât lis cjasis dal borc e che al è continuât cul taramot. L’Orcolat al à sdrumât buine part dai edificis, e al à mudât cheste biele localitât intun paîs fantasime. I stelans si son sparniçâts ator pal mont, tancj in Francie, in Belgjiche, in Canadà, in Australie. I pôcs a restâ a jerin i vecjos che no rivavin a çoncjâ il leam cul paîs dai lôr vons: chei altris a son lâts, ancje se il rapuart cul lôr paîs dispès al reste fuart, almancul tal cûr.
La mont ator di Tarcint, tormentade dai slacs e dal abandon, e à vût la stesse dinamiche di spopolament. Di Sedilis a Samardencje, di Cuie a Malemaserie, ducj i paîs si son ridots une vore di popolazion ma Stele ju bat ducj: tal 2000 e je rivade a 4 abitants. Cumò dut câs alc al sta cambiant e une biele storie e à za fat capî che par Stele la ruede dal avignî e sta zirant pal miôr. Su cheste mont la vite e va indevant, cu la muse contente di doi zovins gjenitôrs, Alex Micco e Sara Sanzini, che a àn sielzût di tornâ a vivi a Stele. Lôr a son il pari e la mari di Adele ed Elisabetta, dôs zimulutis nassudis trê mês indaûr e che a àn puartât la popolazion dal borc a dopleâsi. La gnove famee, cui siei cuatri components, e à fat rivâ il numar dai abitants a 8.
La nassite di chestis dôs frutis no dome e à fat cressi il numar dai stelans, ma soredut e à tornât a fâ cressi i butui de vite intune des plui bielis frazions montanis dal Comun: un piçul piûl sul Friûl dal aiar purissim dulà che i doi zovins a àn sielzût di vignî a stâ trê agns indaûr, recuperant la cjase di famee di Alex tal borc dai Michs (version in marilenghe propit dal cognom dai Micco). Alex achì al è tal so habitat naturâl. Di fat al è fì di Ferruccio Micco, ancje lui nassût e cressût in Stele, e l’amôr pal paîs di so pari al è cussì fuart che cuant che al à cjatade la morose le à menade fin ca sù, intun puest che al è romantic di viodi, ma dificil di vivi. Dut câs Sara, che e ven de plane, no à vût dubis: e i doi fantats si son trasferits achì “intun cjanton di Paradîs – e conte la neo-mame – che al è il miôr puest tal mont dulà che o volarès cressi lis nestris picininis”. Par sigûr no je une robe scontade: e je une sielte che e vûl dî che dome par cjoli il pan o fâ la spese o lâ dal miedi al covente percori siet chilometris di tornants par lâ jù fin a Tarcint, che si ridusin a cinc par cjatâ une ostarie a Zomeais. Ma par judâ i doi zovins a son simpri i nonos e la strade par Stele e je simpri un grum traficade in chestis setemanis. Bon segnâl.
Il panorame, l’aiar fresc e la vite tal mieç de nature di fat a compensin ducj i eventuâi problemis che a àn lassât Stele simpri plui vueide e che a rindin ecezionâl chest event. A son passâts di fat nie mancul che 45 agns di cuant che al è nassût l’ultim frut in Stele, di gjenitôrs ancje lôr di Stele e che naturalmentri a son ancjemò in dì di vuê residents culì. Chel picinin si clamave Adriano Moro, fì di Adone e Lucia Moro. In ducj chescj agns però nissun nol veve plui tentât la venture di stabilîsi, restâ a vivi e procreâ su chê mont. Alex e Sara sì. E lis lôr dôs zimulutis a son deventadis za un câs mediatic: la lôr storie e je rivade fin al Tg2 e a Canale 5, tal program pomeridian di Barbara D’Urso che al è cjalât di milions di spetatôrs. Nancje nassudis, a son za dôs Stelis. ❚
Walter Tomada