SPECIÂL – Un deputât furlan tal Parlament di Viene

Luigi Faidutti al nassè a Scrut, tal Comun di San Lenart, ai 11 di Avrîl dal 1861. Al fasè lis elementârs tal so paîs e a Cividât; tal ‘Seminari di Udin al frecuentà il liceu e i prins doi agns di teologjie, mostrant une inteligjence vive. Pes condizions economichis griviis de famee al fo trasferît, in gracie di une borse di studis, tal ‘Seminari di Gurize e al fo ordenât predi ai 7 di Jugn dal 1884. Po dopo al le a studiâ te Universitât di Viene, cjapant la lauree in teologjie e, tornât a Gurize, al insegnà tal ‘Seminari. Subit, ancje sburtât de encicliche «Rerum novarum» buride fûr di Pape Leon XIII, là che si invidave i predis a «jessî des sagristiis», al scomençà a dedicâsi ae ativitât sociâl e politiche.
CUI CONTADINS_ Il so sproc al jere: «Cui contadins e pai contadins: jo par lôr e lôr par Diu». Tai ultins dîs agns dal Votcent al vuidà il moviment cristian sociâl, tirant dongje la popolazion contadine de Contee di Gurize e di Gardiscje imperiâl. Al promovè tanton la cooperazion: tal 1895 al invià la Cassa rurale di Caprive, tal 1899 la Federazione dei consorzi agricoli del Friuli cuntun centenâr di associazions (cooperativis di consum, consorzis agraris, assicurazions pes bestiis e cuintri de tampieste e v.i.), tal 1900 la Banca friulana. Chest ativisim cence polse al veve un voli di rivuart ancje pai zovins. Al deventà conseîr comunâl a Gurize, deputât de Diete provinciâl e po dopo, nomenât dal Imperadôr, Cjapitani provinciâl: al veve sì che duncje sedi funzions religjosis che politichis.
UN IMPEGN TOTÂL_ Faidutti, elet deputât tal Parlament di Viene tal 1907 e tal 1911 insieme cun Giuseppe Bugatto, si impegnà cetant in diviers cjamps: agriculture, pat colonic, lote cuintri de pelagre, scuelis, stradis feradis, oparis publichis, cjasis popolârs, universitât taliane. Tai documents publics si definive «deputât furlan tal Parlament di Viene», li che nol viveve mâl la situazion di multilinguisim stant che al fevelave talian, todesc, sloven e furlan, e al fasè cetant pal ricognossiment dal popul furlan di bande dai sorestants austriacs. Sul finî de prime Vuere mondiâl al invià une campagne politiche pe autonomie dal Friûl orientâl dentri di une federazion di stâts sot de influence austriache. Il so impegn pal dirit di autodeterminazion pal popul furlan (viôt il box chi dongje) cuintri de jentrade tal Ream talian, i metè cuintri lis autoritâts talianis che i dinearin di tornâ in Friûl e che lu viodevin tant che traditôr de patrie. Faidutti, autôr cun Bugatto de L’attività del Partito cattolico popolare friulano negli ultimi venticinque anni (1844-1918), nol metè plui pît te sô citât.
LA ULTIME IMPRESE IN ESILI_ La Sante Sede, no podint lassâ in bande un om cu lis sôs capacitâts, lu mandà tal 1924 ae nunziature de Lituanie tant che «auditôr». Tal 1927 al rivà a fâ une altre grande imprese: un concuardât jenfri la Lituanie e la Sante Sede. Al murì a Köningberg ai 18 di Dicembar dal 1931 e al fo sepulît a Kaunas.
Un om straordenari che al à scugnût paiâ, cause de prepotence dal nazionalisim talian, il so grant impegn pe int e pe tiere furlane cul slontanament di chel Friûl che lui tant al veve tal cûr.
Elena Zanussi