Jacopo Linussio & jeans: il ‘fashion’ acessibil

Sabide ai 15 di Fevrâr, tal palaç Frisac di Tumieç, e je stade screade la mostre ‘Jacopo Linussio & Jeans’. La mostre e je une des tantis iniziativis che la Aministrazion Comunâl tumiecine e sta puartant indevant te suaze dal progjet ‘Carnia 700’. Cheste mostre e je stade metude adun di Sandri Di Svualt che, te sô vieste di naratôr, al dîs: “Il naratôr antîc al jere chel che nol inventave nuie di gnûf ma che al spiegave ce cu jere. Jo no inventi nuie, semplicementri o cjapi tantis robis par cirî di contâlis a la int, soredut ai cjargnei. Tal prin plan de mostre si cjate la esperience di chest grandissim imprenditôr, Jacopo Linussio, che al à rivât a vê fin a 32.000 dipendents. Soredut, e covente par fâ capî cemût che, tal tessil, la Cjargne e à vût une sô storie cetant impuartante. La part parsore e je dute peade ai jeans, parcè che une carateristiche dal Linussio e je stade chê di svilupâ une lavandarie interie pal colôr perlin (chel che par talian al è clamât “indaco”, NdR) par colorâ la tele, nassude te tiere indentri venite. La sô funzion e je stade chê di rindi economichis lis telis, ridusint la trame, e duncje di fâlis deventâ ae puartade di dute la int e di ducj i tacuins. Si cjatin lis spiegazions di ce che a son i jeans: noaltris cun chest tiermin o intindìn i bregons, ma te realtât e esisteve la tele jeans che une volte e jere un denim che, a sô volte, a Gjenue si clamave “blu de jeans”, riferît al colôr. E je dopo la part fashion de mobilie, elements storics de aziende Diesel, la esclusive di un divan fat a pueste de Moroso in jeans, cuntune tele produsude di Diesel e il contribût e la fantasie in jeans di diviers autôrs impuartants.”
Il prof. Gilberto Ganzer, colaboradôr te realizazion, dutune cun Attiliana Argentieri Zanetti, al met in lûs che “La evoluzion de aziende Linussio nus lasse maraveâts pe sô modernitât. La storie e je impuartante se nus pues dî alc ancje vuê, se no devente dome memorie storiche. Linussio al è tant atuâl che al continue a dînus alc ancje vuê. Achì si è cjapât il cjaveç te tele jeans za presinte tai siei campionaris, tenzude cul perlin, tipologjie che i Americans a àn fate lôr un secul e mieç dopo. I campionaris origjinâi de dite Linussio a son dal 1764, ma al è clâr che si faseve e si doprave ancje prin.”
La mostre (vierte fin ai 27 di Avrîl) e merete di jessi viodude par rindisi cont de grande imprese di Jacopo Linussio che in Cjargne al à puartât lavôr a tante int – un lavôr che spes al vignive fat ancje in cjase – e che al tornave a invistî i utii sul teritori, par esempli svilupant la viabilitât (a son stâts fats doi puints impuartants: un a Damâr e un altri cuviert a Cjavaç, che tal 1809 al è stât brusât inte ritirade dai austriacs). I contats strents di Linussio cun Vignesie a àn favorît no dome i scambis comerciâi ma ancje chei culturâi e, in gracie di chest, cjasis e glesiis si son impreziosidis di ogjets e oparis di art impuartantis.
“La Cjargne – al zonte il professôr Ganzer – e varès di imparâ tant di Jacopo Linussio, parcè che si trate di une figure che e à savût cjalâ al teritori; no di sigûr chê industrie di rapine che si viôt vuê, dulà che i bêçs a finissin invistîts cui sa indulà, in cualchi strane societât, cun di plui foreste.” ❚
Marta Vezzi