L’atac di Fontanini: “La regjon i crôt pôc al furlan”

“La marilenghe e riscje une rapide estinzion se, ae sô tutele, no vegnin destinâts contribûts di bande de Regjon. E in cheste Zonte, componude da int che e fevele par talian, no nudrìs tante fiducie. Partant il destin al è segnât”. La denunzie e je chê dal President de Provincie di Udin, Pietro Fontanini, che al ponte il dêt cuintri l’esecutîf regjonâl pôc sensibil ae valorizazion dal furlan. “Tancj, masse e insopuartabii – al continue Fontanini – a son i tais fats tai confronts de marilenghe, une maniere di operâ che cheste Zonte e à ereditât dal precedent esecutîf cuintri di cui mi soi lamentât plui voltis par esprimi contrarietât e disaprovazion pes sieltis fatis.
Se e je la volontât di dâ une prospetive, un avignî a une lenghe che e je fonde de nestre identitât e de nestre specialitât – al continue Fontanini – se e esist pardabon cheste svintulade sensibilitât par dutis lis minorancis linguistichis, a àn di jessi metudis a disposizion risorsis par supuartâ intervents e progjets di pueste in cualsisei setôr a tacâ des scuelis. E invezit, si tain fonts propit aes lezions par furlan tes scuelis, intervents che a podaressin fâ cetant te opare di divulgazion e salvavuardie de lenghe. Tais fats ancje in presince di une significative domande di cheste sielte di bande des fameis ancje tal 2013”.
La cuote destinade a cheste finalitât pal 2014 e je stade smiezade, “un tai – al rileve Fontanini – che si zonte ae pesante riduzion dai fonts destinât al Arlef pe programazion de politiche linguistiche. Non stin a fevelâ dai fonts de Leç 482 destinâts ae Provincie di Udin. Al dì di vuê, ancjemò, no vin ricevût di bande de Regjon nissune comunicazion par ce che al tocje il finanziament pal 2012. Comunicazion che e doveve jessi mandade vie pal 2013.
In spete dai fonts (la tendence tal cors dai utlims agns e sta calant: 48 mil euros tal 2011, 68.300 tal 2010, 65 mil tal 2009  in rapuart a cifris ben plui significativis tes anualitâts precedentis), la Provincie – al continue Fontanini – e fâs la sô part cun lis risorsis di belanç sostignint ativitâts indreçadis dal Ent come il notiziari setemanâl par furlan (Contile Juste), supuartant iniziativis di associazions locâls, publicazions e progjets. E e continuarà su cheste strade, par ce che al è pussibil, cussiente che il clime tai confronts de marilenghe al è in ogni câs sfavorevul ancje par vie – lu amet – dai furlans stes che lu lassin di bande. No ducj però. Significative, a chest proposit, la percentuâl dal 70% dai gjenitôrs che a àn domandât l’insegnament dal furlan tes scuelis primariis. La Provincie – al finìs Fontanini – e continuarà te sô azion di salvavuardie, parcè che la lenghe e rapresente il cûr de nestre identitât, dal nestri popul. Un patrimoni impuartant che al va salvât dal pericul di estinzion e omologazion”. ❚
✒ Redazion