Il storic laminadôr di Sant Zorç di Noiâr picjât a di un fîl

Evraz Palini e Bertoli S.p.a. al è un laminadôr che dal 1992 al opare a Sant Zorç di Noiâr (UD).
Al prodûs lamarins di tren cuart di açâl e al è, intal so setôr, la realtât produtive plui grande dal centri-nord Italie, vint une capacitât produtive di 500.000 toneladis par an, cuntune grande sielte par cualitât e par dimension. Intal 2005, la holding internazionâl Evraz Holding, di proprietât dal grant maiorent rus Roman Abramovich, al à acuisît il control de societât.
Al somearès, duncje, pardabon dut positîf pal futûr ocupazionâl dai 146 lavoradôrs, cuasi ducj residents intai comuns de basse furlane.
La trancuilitât e dure dome siet agns, vâl a dî fin cuant che la Palini e rapresente un “afâr” pai rus. Intal 2012, la crisi di setôr e colpìs ancje la stesse Evraz: e je masse ufierte e pocje domande.
Intal Fevrâr dal 2013, dilunc di une tratative pal rinovament dal premi di risultât aziendâl, il gnûf aministradôr delegât Dimitri Sucka, inviât dai rus, nus comuniche cierts dâts preocupants di belanç. Une vere e proprie glaçadure. E lis pierditis a van indevant a cumulâsi ancje intal 2013.
Magari cussì no, cemût che dispès al sucêt, la responsabilitât sociâl des Multinazionâls e je zero. Lis filiâls tal forest, di fat, a rispuindin al “centri” e a assumin il rûl di semplicis esecutoris di ordins vûts dal alt.
La prime propueste de aziende e je stade chê di taiâ lis retribuzions dai lavoradôrs. Une idee balçane, stant  che inte siderurgjie i coscj che a fasin la diference a son chei de materie prime, dai traspuarts, de energjie e no dal sigûr chei dal lavôr.
Intant che al jere in at un confront par cirî lis soluzions pussibilis e idoniis par fâ “cuadrâ i conts”, e rivà une altre glaçadure, stant che l’aministradôr delegât al à decidût di fermâ la produzion, in spiete de riprese dal marcjât dal lamarin. Intai 146 lavoradôrs siderurgjics , usâts a une vite spindude a lavorâ su trê turnis, a chel pont si è insinuât il pinsîr, o miôr la pôre, parcè che “un laminadôr fer al è un laminadôr muart!”.
Siopars, presidis, assembleis, ma – dai 20 di Avost – l’implant di Sant Zorç di Noiâr al è cidin in maniere malinconiche: nissune “melodie” ritmiche di lamarins che a corin intai rodui di trasformazion, nissun “profum” di açâl intai reparts deserts.
A Novembar dal 2013, intant che si tignive une tratative par provâ a recuperâ la situazion, al è stât inmaneât un presidi colorât e partecipât devant de sede di Confindustrie a Udin.
A diference di chês altris voltis, si rivave a formulâ un program di ripartence – cui coscj anetûts – par un gnûf inviament. L’aministradôr delegât Sucka, però, al ripeteve tant che un mantra che la ripartence e pues jessi dome a cundizion che e miori la situazion di marcjât.
Tra cualchi setemane al varès di jessi l’incuintri là che si savarà se la Palini & Bertoli e tornarà a partî o se, al contrari, si assistarà ae sierade di un laminadôr che, in graciis de professionalitât dai lavoradôrs, fin al 2012 al jere il miôr dal grup Evraz.  ❚
Francesco Barbaro
sindacalist de FIM CISL di Udin