Une tiere, trê cjâfs e fantasie par fâsi cognossi miôr

O vin di metisi dacuardi une volte par dutis. La mont dal nestri Friûl puedie fâ dal turisim une vere fuarce? Puedie rivâ a aumentâ il so atrat a nivel nazionâl e internazionâl? Puedie garantî lavôr e oportunitâts ai zovins di chenti e magari ancje di di fûr? Se o rispuindìn di no, va ben, continuìn a stâ su sul pêl de aghe, cemût che o vin fat in chescj agns, gjoldint di une bande de fedeltât di chei che si sono inamorâts di mulets de Cjargne o de Val Cjanâl e che a tornin ogni an a passâ cualchi dì di polse, o pûr di chei forescj dal est Europe che a coventin dome a jemplâ lis cjamaris di albierc tai periodis di basse stagjon. Se o rispuindìn invezit di sì, ben, viodìn alore di meti dongje resonaments e politics che a rivin a dreçâ la situazion.
✽✽
DISGRESÌNSI
Prime di dut, intindìnsi tra di nô, int de mont: vonde barufâ, vonde zelosiis o rivalitâts, vonde viodi il forest che al rive come un pês e no come une risorse, vonde viodi il furlan che al rive sù par invistî come il diaul di fâi la vuere, vonde sierâ la cusine aes dôs dopodimisdì, o aes nûf di sere. E je vere, e vûl pazience, strenzi i dincj, gloti amâr, ma se o pensìn che a la lungje al pues funzionâ, o rivìn a cambiâ prospetive.
✽✽
IDEIS
Seconde robe: ce podìno vendi al turist di particolâr, di biel, ma ancje di gnûf? Cemût lu rivìno a emozionâ, a fâi pensâ “Usti, ca sù e vâl pardabon la pene di tornâ”? Ben, o vin dome l’imbaraç de sielte. Di Istât la nature, i trois, la aghe dai riui, i crets ma ancje i museus, il mangjâ ben, il relax… E alore din spazi aes cjaminadis o aes escursions vuidadis, ai zîrs in biciclete, aes rimpinadis, aes visitis vuidadis e aes cercis des specialitâts. Di Invier, la nêf: e alore pontìn a fuart sul schi, su lis gjaspis, ma ancje sul snowboard, sul schi di alpinisim, su lis fiestis tes baitis. I disarês, ce aial scuviert, la aghe cjalde chel chi? No, culì al sta il biel, tirìn fûr la fantasie, olsìn. Provìn a proponi a la famee che e rive cui fruts de citât, che la buinore ju puartin a cjapâ sù lis verduris dal ort e dopo che ur insegnin a cusinâ cu lis ricetis di une volte; pensìn al grup di zovins che a metât zornade ju puartìn a svolâ cul parecleve o cul deltaplan, e dopo, la sere, aperitîf e musiche tes termis di Darte. Fasìn une “Fieste in blanc” esclusive tal Museu di Tumieç, dulà che bisugne barufâ par sentâsi a taule e par cerçâ i plats dai miôr cogos de mont che si sfidin. A son dome un pâr di ideis butadis li, par rindi il discors, cence dismenteâsi che dut ce che si à costruît fin cumò nol bisugne gran butâlu vie. Anzit.
✽✽
MENADÔRS (VUIDIS? DIREZIONS?)
Tierç pas: imparìn a vendisi ben, a meti di bande la modestie o la zelosie par chel che o savìn produsi o coltivâ. E alore, vonde resonâ par valadis o par comuns. Vonde framentazions di ents che a fasin lis stessis robis. Cjargne, Tarvisian e Glemonàs a indichin un coordenadôr parom, un sgai e intraprendent e soredut decisionist, che al à di fâ di filtri tra lis associazions, i parons dai albiercs, i consorzis e i sindics. Si bute jù ce che al pues ufrî ognidun, si crein i pachets turistic, si decît un calendari di events e di manifestazions unic par dute la mont, che finalmentri al rivi a eliminâ doplons o sormontaments di datis. Si sielç une date par presentâ i programs pe stagjon invernâl e par chê estive. Si prepare un plan finanziari dulà che ducj a metin alc e magari la regjon un tic plui di chei altris. Si pompe dentri di brut te comunicazion e te publicitât, a nivel nazionâl e tal forest; si lavore di internet e di social network.
✽✽
INVISTIMENTS
Cuarte sfide: o vin di recuperâ su pe cualitât dai nestris albiercs, incentivâ e duncje slizerî in cualchi maniere des tassis chei imprenditôrs che a vuelin invistî par rinovâ lis lôr struturis. O vin di aumentâ i puescj jet cun gnûfs hotel, e magari proponi ai grups di zovins che no vuelin spindi trop, ufiertis tai albiercs difondûts che si stan compuartant ben in chest agns. O vin ancje di pensâ che se o volìn puartâ turiscj da la Europe dal Nord o de Russie, al è inutil lâ a â fûr volantins tes fieris di mieç mont se dopo no rivìn a metiur a disposizion avions che ju discjamin  a Ronchi, e  servizis di traspuart par puartâju tai nestris paîs. Continuìn – e par fortune cualchidun lu à za capît –  a sfrutâ la nomee dal Zîr di Italie di ciclisim, invistint tai servizis pai cicliscj, di chel che al comede lis cjamaris di arie a chel che al ospite i campers. Tornant al Invier, il probleme dai implants pal schi che no rivin a cuvierzisi i coscj, aumentant an dopo an la buse di belanç di Promotur, cemût podìno risolvilu? Forsit cinc pôi in dute la regjon a son masse, provìn a pontâ dut sui doi che a tirin di plui, Zoncolan e Tarvis, e in chei altris resonìn par une riconversion graduâl che e sepi dâi un tai diviers a la ufierte turistiche.
✽✽
OLTRI IL TRIESTIN
Al samee facil, o sai, scrivilu: dopo, invezit, te pratiche dut si grampe, si sfrenç, si sfante. Ma fantats, il mont si è slargjât, no vin di fâ plui i conts dome cul triestin che al rive sù “a magnar el panin co la marmelada”. O jentrìn te sfide globâl, o se no, come che o disevìn in principi, continuìn a stâ su sul pêl de aghe… fin cuant che no sarìn infondâts par ben. ❚
David Zanirato