Marilenghe, il contribût ae tutele di bande de Glesie furlane

“O vin di jessi grâts ai oms di Glesie se il furlan al à un spessôr culturâl e al è cussì difondût. Se e je une istituzion che e à difindût la nestre lenghe, cheste e je propit Glesie Furlane”. Cussì il president de Provincie di Udin Pieri Fontanini al è intervignût intal ambit de cunvigne “La tutele de lenghe furlane e la Europe. Lenghis, religjon, scuelis dal Friûl” organizât a palaç Belgrât dal grup di studis storics e sociâi “Historia” di Pordenon. “O ricuardìn – al à zontât Fontanini – la opare di pre Bepo Marchet che al à elaborade la gramatiche furlane intai agns 50-60, la traduzion par furlan de Bibie par opare di pre Checo Placeran (che al à contribût a fâ cressi lis istancis autonomistis e lis sperancis dal popul furlan) e di pre Toni Beline, grant inteletuâl che al à aumentât il nivel de leterature furlane. Glesie Furlane – al à concludût Fontanini – e à insegnât la impuartance de rapresentance politiche pal nestri popul cun contribûts impuartants. O sperìn che il lavôr a pro de marilenghe nol ledi a finîle dibant”.
Rivuart al leam fuart tra Glesie furlane, fede, lenghe e culture, elements de nestre cussience identitarie, Lorenzo Zanon, president de ARLeF, al à vût indiment il grant sucès de leture integrâl e continue de Bibie par furlan. Si è tratât di un avigniment organizât inte Vierte dal 2011 – il prin in assolût tal mont, che al à viodût protagoniste une lenghe minoritarie – cun rispuestis tant impuartantis, otignudis in tiermins di contats, letôrs, volontaris, auditôrs. “Un avigniment che al lee la lenghe ae religjon, ae fede, che al à dimostrât il grant amôr dal popul furlan pe sô lenghe”, al à comentât Zanon intal ricuardâ la impuartance dal insegnament de lenghe e de storie furlane a scuele. “Un dirit ancjemò dineât – al à precisât Zanon – e cun risorsis insuficientis”.
Pre Roman Michelot al à presentât il percors di impegn pe lenghe furlane inte liturgjie e intal impegn sociâl dai cristians furlans, ilustrant la ativitât di Glesie Furlane, la associazion che e va dafonts des lidrîs culturâls e religjosis, par conciliâ in mût armonic la proprie fede cu la proprie identitât culturâl. Ven a stâi, par dâ ae nestre fede il savôr de nestre tiere.
Aureli Argemì dal Ciemen di Barcelone al à presentade la sô ricercje su lis posizions di Pape Francesc, cuant che al jere cardinâl, in favôr dai popui autoctons de Americhe Latine.
Guglielmo Cevolin, president di Historia, docent ae Universitât di Udin e espert di tutele juridiche des minorancis linguistichis e nazionâls, al à descrit invezit i progjets “Latuastoria” e “Latualingua” pes scuelis secondariis di II grât de provincie di Udin. Si trate di doi progjets multimediâi, a disposizion sul sît www.eurohistoria.eu, fats in colaborazion cu la Provincie di Udin, e finalizâts a svicinâ i students dal nestri teritori ae Europe, midiant la cussience di vivi intune tiere straordenarie dal pont di viste de ricjece dal plurilinguisim (progjet Latualingua) e de storie locâl (progjet Latuastoria). ❚
✒ Redazion