FriuliDoc Festival des minorancis? La propueste di Adriano Ioan

La idee e je vignude pensant a “Pordenonelegge” di Pordenon e in part ancje a “Gusti di frontiera”, a Gurize. Pussibil che Udin, a mieze strade fra chês dôs citâts, no rivàs adore di fâ une sintesi? Pussibil che no si rivàs a meti dongje, sposâ l’aspiet enogastronomic e chel culturâl? Su chescj doi pinsîr Adriano Ioan, conseîr comunâl dal grup “Identità civica” a Udin, za candidât sindic de stesse citât par il centri drete cuintri di Honsell, al à formulât la sô propueste: tornâ a dissegnâ “Friuli Doc”. Vonde dome mangjadoriis e cjochelis, vonde berlariis in plene gnot, vonde cuintâi e cuintâi scovacis. La soluzion e je trasformâ la manifestazion di Setembar intun “festival” dedicât a dutis lis minorancis linguistichis e culturâls europeanis. “Une fieste multiculturâl e plurilinguistiche che chi e varès la sô naturâl scune, par vie che lis nestri lenghis, furlan, sloven e todesc a deventaressin l’element di viertidure viers di chês altris”, al spieghe Iaon. “Jo no dîs di gjavâ l’element gastronomic. Jo o propon di zontâ a chest un aspiet culturâl, che al sedi ancje moment educatîf e informatîf. Si podarèssin promovi lûcs, poesie, leterature, spetacui e vie indevant. La olme culturâl de manifestazion. I ‘nd varessin alc ce dî: la nestre conotazion e peculiaritât, la presince di plui lenghis sul teritori, e sarès un spieli pes altris culturis e lenghis de Europe. Par esempli, si fevele cetant di internazionalizazion: cuâl miôr imprest se no i tancj idiomis europeanis par sburtâle?”.
Adriano Ioan, 55 agns, al è ancje insegnant, profession che al esercite dal 1983. “Pensi – al zonte – ancje a tirâ dongje i zovins, in gracie ae culture. Un mût par riclamâju ancje di altris paîs”. La propueste di Ioan e je saltade fûr propit a cjalt, daspò i dîs di “Friuli Doc”: “Si faseve la solite conte di cetantis scovacis, di cetancj cjocs, di trops intervents des fuarcis dal ordin par blocâ lis pestadis. Esatementri une setemane dopo o ai viodût la sêt di culture che si respirave citât tal Friûl Ocidentâl. Int che si fermave e mangjave cence passâ la linie. Alore o pensi a une ricualificazion di Friuli Doc, in mût di elevâlu a brand pes ecelencis enogastronomichis de nestre tiere e di zontâi dongje l’element de culture”. A chest pont la domande e je: trop di chest si rivaraial a imbastî? “Si trate dome di une idee, nassude dopo che mi vevin domandât un parê su Friuli Doc. E cui che al è sentât in oposizion nol à cetante pussibilitât di azions”. E reste dome une idee, duncje. Une propueste astrate. E cuissà se la cjaparà in man l’assessôr competent. ❚
Oscar Puntel