EDITORIÂL – Par no tornâ indaûr. La crisi e muart ducj, ma no i politics

✽✽ E je grivie cuasi par ducj, no dome par chei che a son simpri stâts i ultins e cumò a son fûr classifiche e a fasin pardabon fadie a comedâ gustâ e cene, ma ancje par chei che a crodevin di stâ un scjalin parsore e cumò a son cûl cul par tiere. E nol è il finâl di une filastrocje. Cuasi par ducj, parcè che par cualchi categorie invezit e continue a lâ ben, anzit benon, e i politics a son la maiorance dal grup.
✽✽ Di front ai numars che ogni dì o leìn su lis fabrichis, su lis buteghis che a sierin, o fasìn fadie a pensâ che e sedi vere, ma purtrop e je cussì.
✽✽ Chel Friûl che cun fadie o vin tirât fûr de miserie, al torne a jessi reâl denant dai nestris voi. Mieç secul butât vie tal zîr di pôcs agns, un Vaiont, un Orcolat dal sociâl che al pues jessi piês di un disastri naturâl.
✽✽ O crôt dut câs che alc o vin di fâ, cence spietâsi masse dai sorestants. Anzit, viodude la maniere che si movin, stant une vore atents a chel che a proponin.
✽✽ Dome un pâr di esemplis, par capîsi. Nissun te zonte Serracchiani aial pensât di domandâ a Terna, la societât che à di costruî l’eletrodot, di podê jentrâ tal afâr cuntune partecipazion de Friulia, la finanziarie regjonâl, naturalmentri cu la clausule dal intierament? Figurâsi. A àn dite di sì al progjet cence domandâ nuie: al siôr paron talian si dîs dome “Siorsì”! Ma ancje se al è svedês, tant che l’Elettrolux. Di front a ducj i bêçs e contribûts regjonâi, no saressial rivât il moment di un biel ricat: volêso sierâ Porcie? E la Regjon e secuestre la fabriche.
Parcè si puedial fâ cui mafiôs e no cun chei che in ducj chest agns a àn doprât e sfrutât il nestri teritori e magari paiât lis tassis di une altre bande?
✽✽ La rispueste ae crisi de bande de Serracchiani invezit si môf sul plan de visibilitât: mai “furlan”, par mût di dî, al è stât in television, plui di jê. Ma le vêso mai sintude fevelâ dal Friûl?
✽✽ La deleghe le à dade dute al so vice Bolzonello, anzit lis deleghis, viodût che al ex sindic di Pordenon i tocje ocupâsi di industrie, cumierç, turisim, agriculture. E je in television, a pensâ al congrès dal Pd, a firmâ par regjons alpinis e balcanichis e lui a fâ front a dutis lis cuistions. Us someie une robe serie e soredut che e puedi funzionâ ben? Impussibil par un di bessôl.
✽✽ La rispueste a chê crisi che e pues puartâ al pestefruce di dut il Friûl fin cumò e je intune struturazion de Regjon, scancelant lis provinciis: cheste la lôr principâl preocupazion. Par sparagnâ, a disin, ma no je vere, e intant no passe zornade che no vegni fûr in ce maniere vergognose che i conseîrs a spindevin i nestris bêçs.
✽✽ Ce fâ alore? Rispueste dificil. Forsit, propit pensant ae ricostruzion daspò dal taramot, partint dai paîs, dai sindics. A saran une vore chei che a laran aes elezions il prossim an. Nus coventin sindics che a pensin furlan, dome pal Friûl e pe sô int, come chei dal ’76.
Chei che a pensavin prime aes fabrichis, aes cjasis, ai asîi, che al stipendi e al partît. ❚
Dree Valcic