I fogolârs a son furlans ancje se a fasin 60 agns

A son passâts 60 agns de nassite di “Friuli nel Mondo”, e bielzà dal non par talian une contradizion mi salte fûr, ma no sarà ni la prime ni la ultime.
Ma, par no semeâ simpri bastian contrari, o scomenci dal fâ fieste pai nestris Fogolârs sparniçâts in ducj i continents, cul auguri ai nestris emigrants di podê cjatâ simpri un lûc par no dismenteâ la Patrie, dulà podê fevelâ par furlan e ancje cerçâ un bon tai e un toc di formadi e salam.
Cualchidun al tacarà a dî che e je une vision arcaiche, che nissun al va vie plui cu la valîs di carton peade cul spali, che vuê a partissin i laureâts cul computer, e vie indenant. Veretât di sigûr, ma o crôt che cheste modernitât, cheste globalizazion, ancje inte emigrazion, no cambii la fonde dal rapuart tra furlans tal forest.
Ce cirial, e ce aial cirût, in plui di mieç secul, il nestri furlan lontan di cjase?
Di no sintîsi taiât fûr, di rivâ a mantignî un leam salt cu la sô tiere, no dome cu la famee o i parincj, ma cu la idee gjenerâl dal Friûl. Che e sedi la musiche o il bal, lis barzaletis o lis contis pai frutins, la prime robe e jere “no dismenteâ”.
Si pues capî alore cemût che, in ducj chei agns, soredut tra i prins dal dopovuere, i imprescj puartâts indenant dal Ent a sedin stâts chei che o podìn clamâ di intrateniment, un visâsi di ce che si veve lassât indaûr.
Dopo dai prins segnâi, cuant che il rivâ a tornâ in Friûl al someave simpri di plui un sumiâsi alc che nol sarès sucedût, si veve di scomençâ a pensâ aes gjenerazions dal doman, a chei furlans cuntune altre citadinance.
Lis vilotis no jerin plui avonde par cui che al scoltave une altre musiche, che al viveve une esperience divierse dai siei vons, ma che tal cûr, no dome al restave furlan, ma al domandave simpri di plui di cognossi la sô tiere, no dome come che e jere une volte, ma tal dì di vuê.
Alore, vie cun cunvignis, vie a cirî di trasformâ i nestri fogolârs in tantis sucursâls comerciâls, a strenzi acuardis cun altris associazions pal ben dal Made in Italy: ducj ambassadôrs de gnove economie.
Forsit no jere pardabon cheste la istance.
La domande e tocjave invezit la voie di cognossi la realtât dal gnûf Friûl, di jessi pardabon jenfri la sô storie e culture, di savê alc de sô identitât divierse di chê taliane. Invezit si à sburtât viers une omologazion cun chês altris comunitâts, pierdint tai agns un tic di chê muse sclete e furlane che a vevin i nestris fogolârs.
In sumis, tantis “Litte Italy” cun tricolôrs e onorevui, mancul impuartance a chel pinsîr di “diaspore” che al dovarès jessi simpri presint cuant che si fevele de nestre emigrazion.
Une peraule, diaspore, che nus met dongje a ebreus, armens, a ducj chei altris popui che le àn provade tai secui.
Une vore di patiments, ma ancje la cussience che o podìn doprâ chel non, propit parcè o sin un popul.
Une peraule che si à di tornâ a sintî tai nestris fogolârs tal mont. ❚
Dree Valcic