SLOVENIE. la popolazion lis incognitis dal gnûf esecutîf di Alenka Bratušek

L’AUTÔR. Une firme internazionâl prestigjose e comparìs di chest numar sul nestri gjornâl.
Franco Juri al è nassût a Cjaudistrie (Koper) in Slovenie/Jugoslavie intal 1956 di pari furlan e mari cravuate. Gjornalist e vignetist satiric, diplomatic, ex parlamentâr sloven, al colabore cun testadis slovenis e talianis. Intai Agns ’80 e ’90 si è interessât di dirits umans e al è stât deputât intal prin Parlament di Lubiane elet in maniere democratiche. Dopo la indipendence de Slovenie, intai guviers di Janez Drnovšek, al à vût incarghis impuartantis inte diplomazie dal so Paîs: ambassadôr in Spagne e a Cuba, e segretari di Stât ai Afârs forescj.
***
Par vie des circostancis descritis, al jere aromai clâr a ducj che il guvier conservadôr di Janez Janša nol varès podût resisti cence che intal paîs il discontent al sclopàs in tiermins incontrolabii e pericolôs. Janša al à cirût di resisti, convinçût che la oposizion no varès mai podût coalizâ i siei ex aleâts. Ma chescj, un par un, lu àn abandonât. E il leader de diestre, l’amì Orban, al à zigât ‘al tradiment’, al à organizât a Lubiane une proprie cuintrimanifestazion ‘patriotiche’ che e je lade strucje e e à acelerât l’insediament di cuadris dal so partît in dut il tiessût dal stât. Soredut intal aparât repressîf.
A acetâ la sfide di une gnove coalizion in stât di votâ la ‘sfiducie costrutive’ e je stade une zovine deputade dal partît ‘Slovenie positive’ di Zoran Jankovič, Alenka Bratušek. Cuarantedoi agns, abile, laureade in tecnologjiis e siencis naturâls, un master in management, fotogjeniche, e je stade par agns une impleade cetant eficiente di varis ministeris. Dopo lis acusis di mancjade denunzie dai redits di bande de comission anticoruzion a Janša e a Jankovič, e à cjapât in maniere formâl lis brenis dal partît dal sindic di Lubiane. Ma tancj a dubitin che a gjestî la alternative di guvier e sedi jê, e a viodin aes sôs spalis la ombre intrigose di Jankovicˇ e di altris ‘old boys’ che a tiessaressin i fîi di un guvier orientât al vecjo corporativisim. Ma la Bratušek e va indenant pe sô strade e e cîr di amalgamâ partîts politics di segn ideologjic opuest intun guvier in stât di puartâ il paîs aes elezions anticipadis tra un  an. Al è dificil di dî se e par trop timp che e rivarà a puartâ indenant l’intindiment. Il scoi plui insidiôs al reste chel de privatizazion volude dai ex aleâts di Janša e contrastade invezit a fuart dai socialdemocratics.
E dopo e je la incognite Janša. Ae oposizion, l’ex prin ministri al disfrutarà al massim il malcontent popolâr difondût. Il so larc aparât parapolitic e  paramilitâr al cirarà, cemût che al à fat za tal passât cun risultâts palês, di infiltrâ il moviment di contestazion e di acutizâ la proteste di place. Se îr cheste e jere indreçade cuintri di lui, doman e podarès destabilizâ, cu la capacitat di sfonderâ de antipolitiche, ancje il guvier di transizion di Alenka Bratušek. FIN
✒ Franco Juri