E continue la campagne antifurlane, ma la Cort Costituzionâl e conferme la posizion de Patrie

O pensavin che almancul i sindics a vessin il coragjo di metisi de bande dal Friûl, ma evidentementri la “reson di partît” e je plui fuarte. Eh sì, parcè che se idealmentri i aministradôrs locâi a varessin di jessi de bande dal teritori, o viodìn che sedi Menis sedi Bergamin a son ancje lôr “scrofâts” su la posizion filotalianote de maiorance regjonâl di centriçampe che e va daûr de “ultime mode taliane” che za o vin denunciât sul numar di Mai de Patrie di chest an: la peraule di ordin e je “gjavâ lis provinciis” tal non di une unitât regjonâl “friuliveneziagiuliana”.
Noaltris no vin pôre di opinions che no condividìn e par chest o vin dât spazi a chescj intervents. Ma no vin nancje pôre di dî che chestis no son posizions a pro dal Friûl. E se ancje la Cort Costituzionâl e à fermade la riforme Monti su la abolizion des provinciis, noaltris no si fermìn dome a lis cuistions juridichis che a disin che la scancelazion dal ent di mieç no je cussì scontade. Ancje parcè che a diference de normative taliane, la nestre Regjon e à une specialitât e une competence primarie sul teme dai ents locâi: vino di jessi plui talians dai talians? Noaltris no sin dacuardi e o continuìn a bati che la uniche riforme che o sin disposcj a acetâ sul teme “provinciis” e je la division tra Friûl e citât metropolitane di Triest, altri che unitât regjonâl! A son passe 50 agns che chest union fuarçade e pese su la cope dai Furlans. E po la rapresentance dal teritori e à di jessi elete dal popul che al à di savê a cui lâ a domandâ resocont des sieltis. Za si figurìn la sene… un biel consorzi di comuns cun sindics PD e PDL che si spartissin la torte cence dâsi fastidi: lu stan za imparant cumò cul Guvier Letta. Se al è cualchi sindic indipendent, facil fâlu fûr e duncje paronance complete su dut il teritori vast, cun nancje pôre  che a lis elezions ti vegni fûr cualchi Moviment rompitabars a meti il dêt. Bocjeceustu!
Cui che al à voie di continuâ a fâsi lavâ il çurviel al è libar di fâlu, ma noaltris o sperìn simpri che un doman nus puarti finalmentri une classe politiche furlane, dentri, e no sotane a talian vie.
✒ Redazion