TERITORI – Su Facebook par domandâ lis dimissions di Rupel

A son po sù po jù in 19 mil, e le àn sù cun Dimitrij Rupel, plui voltis ministri pai Afârs forescj dal guvier sloven de indipendence dal 1991 in ca. No cate che al sei stât te legjislature passade tal esecutîf di centridrete, il prin ministri Borut Pahor lu à nomenât tant che conseîr speciâl pe politiche foreste tal so guvier di centriçampe. Stant che a plui di cualchi sloven (ancje tai stes partîts che a poin l’esecutîf) cheste sielte no ur è plasude piç, al è nassût un grup su la rêt sociâl Facebook cul titul di Skupaj proti Dimitriju Ruplu (Adun cuintri Dimitrij Rupel). Metût adun ai 28 di Novembar dal an passât, in nancje 24 oris chest grup al à tirât dongje plui di doi mil di lôr, mintri che cuote dîs mil e je stade tocjade vot dîs plui tart. In chest grup, che al cjape dongje int di ogni idee politiche, si son notâts fintremai talians, bosgnacs e serps.
No mancjin i coments, ancje pluitost ferbints, come chel di Franci che al à scrit: «Rupel in pension». Martin invezit al à fat i conts: «Intune cene a Madrid Rupel al à spindût plui bêçs di trops che ‘ndi spint intun mês Pahor!», mintri che par Tomaž «Il turist Rupel al à di gnûf fat lis vacancis metintlis sul nestri cont». Pal rest, lis ofesis – plui o mancul di fantasie – viers il consulent dal guvier Pahor no mancjin.
Viodarìn se cheste gnove forme di proteste di masse «virtuâl» e rivarà adore a otignî cualchi risultât tal paîs nestri vicin: dut câs, cheste e je une altre ocasion li che i Slovens no àn mancjât di pandi il lôr snait!

Alessio Potocco