IL FERÂL. Di Barbiane une scuole di vite

Su finî dal mês di Mai a son stâts ricuardâts i 90 agns che al jere nassût pre Laurinç Milani, predi e mestri che pre Antoni al à viodût come so pont di riferiment, spieli e esempli. E lui, di chest profete, al à vût scrit splendidis pagjinis in “Trilogjie tormentade. No podìn no ricuardâlu.
pre Roman Michelotti
Un secul contraditori il nestri. Nus à colmâts di braure cu lis invenzions tecnologjichis plui impensadis e di vergogne cu lis barbaretâts plui infamantis. Nus à regalât Stalin, Mussolini, Hitler, Franco e compagnie e nus à consolâts cun Gandhi, M. Luther King, pape Zuan XXIII, Romero, mari Taresie e altris stelis.
Don Lorenzo Milani, nassût a Firenze ai 27 di Mai dal 1923 e muart ai 26 di Jugn dal 1967, plui cognossût come priôr di Barbiane, al è un di lôr. Un luminâr di prime grandece pe glesie e pe umanitât, come predi e come mestri. Mestri di umanitât e di testemoneance personâl, patide, tormentade, coerente fint al spasim.
Scuelârs a ‘nd à vût pôcs. I zovins di San Donato a Calenzano te scuele serâl di capelan e i fruts di Barbiane. Ancje libris a ‘nd à scrits pôcs. “Esperienze pastorali” dal 1958, il so libri di fonde, subit censurât dal Sant Ufizi. Plui doi libris componûts insieme cui siei fruts: “L’obbedienza non è più una virtù”, là che al difint la culture de pâs e de no violence cuintri la retoriche dal onôr de patrie di difindilu cu lis sclopis, e “Lettera a una professoressa”, par difindi i puars intune scuele classiste che si scualificave scualificant i ultins. Pasolini al à dit che la “Lettera” e je un model di scriture come contignût e come forme.
Publicazions che a jentravin come spadis in setôrs di fonde, la glesie, la cussience e la scuele, e che duncje no si podeve no lâ a viodi ce che al sostignive cun tante luciditât, novitât, radicalitât e profezie chest ebreu convertît, siôr deventât puar, contestadôr deventât ubidient e duncje plui periculôs. E pûr nissun, ni in ‘seminari ni fûr, nus à mai fevelât di lui. Al è muart che no savevin nancje se al jere esistût.
Si saveve dome che al jere stramp, intolerant, cence creance, disubidient, che al diseve plui mâl dai democristans che no dai comuniscj, che al faseve patî il so vescul (come se cierte int e ves un cûr), che al leve compatît, combatût, ignorât, confinât. In ogni sens. “Nissun nol pues incolpâmi di vê fate cariere – al à scrit ai judiçs -. O ai 44 agns e o soi plevan di 44 personis”. Al à fat scuele ogni dì, fintremai a la ultime zornade. I ultins agns ju à passâts suntune brande, tormentât dal morbo di Hodgkin. Tal ultin nol podeve nancje fevelâ, ma par lui e fevelave dute la sô vite.
Si è batût cuintri la scuele dai siôrs, la glesie dai compromès ideologjics e politics, i plevans e capelans che a spindevin timp e milions par fâ zuiâ la canaie e la zoventût, la prepotence dal podê, la stupiditât e la banalitât, i puars che si ruvinavin par simiotâ i siôrs. Al à dit che no esistin siôrs e puars ma dome studiâts e semianalfabets, condanâts a une eterne sotanance. Al à dit che la glesie e covente dome pai sacraments; par chês altris robis e à di rangjâsi la int. Al à dit che i vescui a fevelin di dut, sigûrs e cence competence, parcè che no àn une mari che ur mole un pataf par fâju cressi o int libare che ju informe. Al à dit che cui che al fevele di amôr universâl nol vûl ben a di nissun e che il predi al à di vê un amôr totâl e gjelôs pe sô comunitât, par piçule che e sedi. Al à clamât pecjât la umiltât dai puars.
Lu ricuardi parcè che al è stât un om straordenari. Parcè che al à patît par colpe di un vescul furlan, Florit, che al saveve a memorie la Bibie e te vite pratiche nol capive nuie. Parcè che, tal gno piçul, ancje jo mi soi cjatât suntune mont, te flôr de vite, a fâ scuele in canoniche ai miei fruts di Val e Rualp e o ai vude la furtune di fâ il so stes mistîr, il plui biel che al esisti: predi e mestri.
Mi à mancjade la sô coerence e la sô santitât ma no lis rognis cu la istituzion. ❚
pre Antoni Beline
Cirint lis olmis di Diu 21.06.1997