FRIÛL EUROPE. Chest al è l’an european dai citadins, par rinfuarcî cussience e partecipazion

Il 2013 al è l’an european dai citadins. Lu vevin decidût ai 23 di Novembar dal an passât 2012  Parlament European e il Consei European cul intindiment di rinfuarcî la cognossince e la cussience dai dirits e des resposabilitâts che a divegnin de citadinance de Union Europeane. La sielte no je casuâl, stant che juste vincj agns indaûr al jentrave in vore dal Tratât di Maastricht, che al veve introdusût propit la citadinance UE, e a son avonde pôcs i citadins europeans che a san di jessi tâi e plui in gjenerâl la apartignince ae Union e piert simpri plui interès e impuartance inte opinion publiche, cemût che al salte fûr dai scandais plui resint dal Eurobarometri. Nol podarès jessi diferent: magari cussì no, tai media si fâs riferiment ae Europe dome par fevelâ di austeritât, bancjis, paritât di belanç e decisions cjapadis sù no si sa ben indulà.
La Comission Europeane e à inviâ rinfuarcî t une campagne di informazion e di comunicazion pontade soredut su lis libertâts e sui dirits che a tocjin la circolazion e la permanence des personis dentri de UE, cence discriminazions di sorte, su lis formis e lis garanziis di partecipazion ae vite politiche e sociâl e duncje su solidarietât, paritât tra om e femine e diversitât culturâl.
Juste ai 8 di Mai stâts, la Comission e à fat bon un gnûf document di indreçament in dodis ponts in cont dai dirits dai citadins europeans. Ancje in chest câs la atenzion e je pontade soredut viers de situazion di chei che si spostin di un Stât membri a di un altri: un fat di grande atualitât, viodude la incressite dai flus migratoris internis.
Une des formis plui interessantis di esercizi di citadinance e partecipazion e je chê che e ven clamade «iniziative dai citadins», ven a dî l’invît fat ae Comission Europeane par che e inviedi un procès legjislatîf su la fonde di une propueste firmade di un milion di citadins che a son a stâ in almancul siet dai 27 Stâts. Za doi agns indaûr cheste strade e jere stade vualmade par rinfuarcî inte UE la tutele des minorancis e dai dirits linguistics. Une mobilitazion di cheste fate e je ancjemò in pîts, cemût che si lei sul sît de Union federaliste des nazionalitâts de Europe (FUEN), che e fasarà il so congrès pal 2013 dai 19 ai 23 di Jugn a Brixen/Persenon.
✒ Marco Stolfo

__________________________________________
Errata Corrige
Si scusìn cul nestri colaboradôr Marco Stolfo e cui nestris letôrs par l’erôr che al è restât tal titul dal articul sul numar di Avrîl: il titul coret al jere “FRIÛL EUROPE. Cooperazion teritoriâl, un avignî di fâ sù e une storie di no tradî”.