Un Friûl diferent tes rispuestis di Cristiano Shaurli, gnûf cjâfgrup dal PD in consei regjonâl

Al è stât salacôr l’unic elet intal gnûf consei regjonâl a vê fat i siei santuts in trê lenghis: par talian, par furlan e par sloven. Parcè che Cristiano Shaurli, gnûf cjâfgrup dal Partit Democratic in Regjon, cressint a Faedis al à imparât a cognossi e a preseâ la dimension plurilengâl di chest cjanton di Europe, siôr di fevelis e di identitâts. E chest i à fat vierzi la cussience ae necessitât di puartâ dentri dal pinsîr de çampe lis istanzis di un autonomisim gnûf, chel che si è dât dongje intor dai fondadôrs di un progjet alternatîf tant che chel di “Un Friûl Diferent”. “Ancje in Catalogne e tal Paîs Basc l’autonomisim al è di fat progressist – al conte – e su chest troi o podarìn inviâ une gnove storie pal pinsîr politic furlan”.
Shaurli al sa che une part no piçule dai 2505 eletôrs che a àn scrit il so non su la schede a contin che lui si impegni su chescj temis pe valorizazion di une vision plui moderne de specialitât. “Tai ultins agns o vin esercitade la nestre autonomie dome in maniere regressive, par difindinus des leçs dal Stât o par sierânus ancjemò di plui”. La suaze dulà insedâ il gnûf autonomisim par Shaurli no je chê des leçs discriminantis sul welfare anti-imigrâts, ma chê di un Friûl che al torni a jessi speciâl (cemût che e dîs Debora Serracchiani) deventant un pont di riferiment pal rest de Italie e par tantis bandis di Europe. “O pensi ae nestre Universitât che in maniere complementâr a Triest e varès di deventâ un pont di atrazion par dute la aree di Alpe Adria”: e la robe e je pussibile se si pense che in Slovenie di Universitâts a ‘nd è dome dôs a Maribor e Lubiane”. Ma nuie fusion: “Ateneus diferents a puedin specializâsi miôr e integrâ la lôr ufierte par rindi il sisteme regjonâl plui competitîf ancje in tiermins di inovazion”.
Ma cun Triest cemût le metino sul plan istituzionâl? “Jo inteletualmentri o sposarès une soluzion come chê dal Trentin-Sudtirol, ma in timps di crisi e di pocje cressite nol è spazi par une soluzion dal gjenar. Miôr dâ simpri plui podê, bêçs e competencis a agregazions di Comun par puartâ la democrazie di prossimitât simpri plui dongje a la int”. Cuntune Regjon lizere e Comuns plui fuarts, “ogni decision e larà inte direzion di rispuindi aes veris dibisugnis dal popul furlan”. E cheste gnove configurazion e permetarà ancje di esaltâ lis peculiaritâts dai teritoris.
Une des plui impuartantis e je propit chê linguistiche. “Il plurilinguisim al à di deventâ il vêr vantaç competitîf de nestre Regjon, massime pai zovins che a podaran sfrutâ in Europe la potenzialitât cognitive che al regale savê plui lenghis. Ma ancje a nivel macroeconomic si podarès vê plui risultâts se si sburtàs lis relazions cu lis altris nazions dulintor, simpri traviers des lenghis.
Ma dulà cjatâ i beçs par podê tutelâ la lenghe furlane e ches altris fevelis mancul pandudis in Regjon? “No vin di platâsi che i bêçs a van pal mancul. Dut câs tancj sfuarçs si puedin fâ zaromai cambiant mentalitât e cjapantsi la responsabilitât di furlans che a àn di crodi te loro lenghe e te lôr identitât. Ma no par lamentâsi come frutins: par esempli vaint parcè che l’assessor ae culture al è triestin. “Gianni Torrenti al crôt intal valôr des identitâts e dal plurilinguisim plui di tancj furlans” al dîs Shaurli, che però al invide a cjalâ indevant. Soredut bandonant la ossession par Triest e ancje la vuere tra puars cui slovens che no zove a nissun. “O vin tantis sfidis par strissinâ il Friûl viers dal avignî” al dîs, e propit pescjant dal program di “Un Friul Diferent” al sielç la necessitât di dotâ il nestri teritori di dutis lis infrastruturis digjitâls che a rindaressin la nestre tiere un puest cun citadins plui libars e impresis plui sioris di relazions cui marcjâts di inaltrò. “Chel de conession digjitâl al è un dirit che nol pues jessi limitât aes grandis citâts come che a volevin Tondo e Riccardi. La mont e à bisugne di jessi in rêt cul mont: dome cussì si podarà continuâ a vivi e lavorâ chenti”.  ❚
✒ Walter Tomada