La Patrie e ringrazie e no dismentee

Aromai no je plui une novitât: il 2013 al sarà pe nestre riviste un an dificil. Lu dimostre la riduzion dal finanziament regjonâl, taiât dal 40%.
Par chest o vin il dovê di ringraziâ cui che al à rispuindût a la nestre domande di jessi judâts.
O ringraziìn la bancje Casse di sparagn dal Friûl-VJ, in particolâr il president Giuseppe Morandini, parcè che nus è rivade la conferme che ancje chest an o podarìn gjoldi dal lôr sostegn e duncje tes filiâls che a son su lis trê provinciis furlanis si podarà cjatâ inmò la copie dal nestri gjornâl. E chest al è il tierç an che o colaborìn.
O ringraziìn ancje il Comun di Udin che ai 3 di Avrîl al à volût consegnâ intune scuele di Udin lis copiis dal nestri gjornâl ai students e ai insegnants: un progjet che al larà indevant par dut l’an: il Sindic Honsell lu veve prometût e al à mantignude la peraule.
Ma soredut o ringraziìn in nestris abonâts che cun fedeltât continue nus stan dongje e nus àn manifestât compliments ancje par cheste gnove vieste grafiche.
A ducj voaltris che nus sostignîts, ancje ta chescj moments di “clâr di lune”, il nestri grazie plui sincîr e sintût parcè che cence di voaltris al sarès une vore plui dificil puartâ indevant la nestre bataie par un Friûl plui furlan. ✒ Redazion