7. DAMNATIO MEMORIAE – Il landri di Sant Zuan

Tal 611 dopo di Crist, avars e sclâfs a brusin Cividât. La popolazion che e à podût salvâsi a je scjampade te zone fuartificade dal Ladri e di Ahrensberg. Chê grote e je simpri stade un puest di grant atrat e frecuentade in ogni timp. Siet crôs disegnadis sutune piere a drete là che a cor la aghe de pissande si riferissin al cult de fertilitât leât al cors des stagjons. Une seconde scrite, sculpide suntune altre piere a çampe de aghe: SASN ven a dî Silvano Augusto Sacrum Nemus, bosc sacri al diu Silvan, diu dai marangons, a conferme de impuartance dal puest fin de antichitât.
La sistemazion dai profugos cividins e à compuartât la ricostruzion de grote come difese, osservatori astronomic e puest di cult. Une epigrafe piturade su malte frescje e dîs: “Agilulf capo dai federats (xenagà) a la ricostruît (epoiêsen exaútis) il lûc sacri (fanôma) cu lis muraiis simetrichis (Iso/kelê)”. Si è sistemade prime di dût la specule de grote che e servive za prime par fissâ la date de Pasche e lis fiestis dal an; dopo de glesie di S. Zuan, là che e sta la scrite e la tor a metât scjalinade sot la montagne pal cuarp de vuaite. Chês muraiis a tanaiis di gjambar a suponte de imbocjadure de grote a clamin lis tanaiis dal gjambar come segno zodiacâl dal solstizi di estât parcè che al cjamine in daûr come il secont semestri dal an. La grote a je il grim de mari. Lis letaris de scrite, cjapadis di alfabets diviers a son un espedient par dî ce che al significhe il solstizi di estât e la impuartance de gjometrie par capî il moviment dal cîl. La “pile” o “sfrantoi”, sgjavât dentri de grote al è l’axis mundi, la matrix, il luvin dal mont, sgjavât de rotazion indaûr dal mont o precession. I cristians a àn viodût te grote, là che cor la aghe vive, il lûc privilegjât pal batisim. Di fat, fint almancul al dissest di cualchi an indaûr par vie dal turisim, dongje de “pile” al jere un lagut cun dentri simpri aghe, parcè che lu vevin impermeabilizât; chê aghe e coventave par bevi cuant che si jere sot assedi e la gnot di Pasche pal batisim cristian, arian pluitost che ortodòs, come il Crist tal Gjordan. Lis glesiis matricis a jerin costruidis dongje di une risultive di aghe vive. Di chê pile, tirant il voli dilunc la galarie paralele a chê pal scolament da lis aghis, si viôt la linie dal orizont là che al cricave il dì al solstizi di unviêr.
Si segnave il pont sutun disc par calcolâ la epate o la etât de lune, decisîf per fissà la date de Pasche la prime domenie dopo de lune plene dal ecuinozi de vierte. Intune letare il frari Colomban dal monastîr di Luxeuil in Borgogne, mandade a pape Gregori Grant tal 598, al fronte la cuestione de date de Pasche e al critiche il pape pes sôs indecisions par pôre dai aquileiês: «Par altri e plui oportunementri la tô competence e varès di trancuilizâti, e invezit, forsit pe pôre di tirâti intor la ustinade critiche de novitât ramacule (hermagoricae novitatis), tu ti platis sot de autoritât dai tiei predecessôrs e in particolâr di chê di pape Leon».
Al vûl dîi che lâ daûr dal custum roman nol è po tant rispietôs dal misteri de Pasche dal Venzeli e de tradizion. A nô nus baste savê che i aquileiês a jerin in question su la date di Pasche cun ducj e chest al pues riferîsi al osservatori astronomic di Antro.
In dì di vuè la precession e fâs jevâ il soreli a uns vincj grâts plui a soreli jevât; tignin cont di un grât ogni 72 agns nus puarte a cjaval dai secui VI-VII. Cui aial detade la epigrafe e a non di cui? O pensi a Gregori patrizi bizantin di Odierç, chel che al à facilitât la salide al ducât di Grasulf II copant a tradiment i nevôts Taso e Caco, scjampâts de presonie dai avars. Al à judât i cividins cu la sô tecniche muradorie e a conclusion de opare al à detade la scrite.
Cent agns dopo al ven ca sù il gramatic Feliç, mestri di Florian, mestri ancje di Pauli Diacun. Fint che al è vivût al à fate scuele ae zoventût di Cividât, vuarfine dai muarts pe sconfite dal duche Ferdulf cuintri i sclâfs. A frecuentavin il coleç ancje i trê fîs di Pemmon Ratchais, Ratchis e Astulf. Al è lui l’ispiratôr di chê svintade culturâl che Cividât e à sfadiât a digjerî, ma che e reste tes robis, percé che il mestri al è muart masse adore. La sô epigrafe inte grote al è un document straordenari: “Jo Feliç indegn, o soi chi sapulît a lis fondis de glesie dai sants Zuan Batiste e Evangjeliste. Us prei voaltris che o vignîs fin ca sù e o tornais a bas che preedis Diu pai miei pecjâts”. Al mertarès un lunc esam, plen come che al è di valôrs epigrafics e teologjics.