Ce sucedial in Europe? Scolte Internazionalitari su Radio Onde Furlane

Internazionalitari al è il program di Radio Onde Furlane che zaromai di un pôcs agns nus fevele des minorancis europeanis. Tal 2000 Carli Pup al à sostituît Max Mauro te redazion e te conduzion de trasmission. Ogni pontade si divît in dôs parts: le prime cuntune interviste e un aprofondiment e le seconde cu lis gnovis di chês altris nazions cence stât. La trasmission e fevele des minorancis europeanis, dilà dai stereotips che dispès si cjatin inte stampe taliane. “Jenfri lis realtâts presentadis o seguìs cun plui costance ce che al sucêt in Irande dal Nord e intal Paîs Basc, parcè che a son tematichis cuntune fuarte rilevance.
Di fat lis pontadis plui bielis a son stadis doi speciâi sul Paîs Basc, il prin su la tregue permanente proclamade di ETA, e il secont su la sô sospension” al dîs Carli Pup. Internazionalitari però nol fevele dome di ce che al sucêt in Europe, ogni an al dediche une pontade di inzornament su la situazion dai Saharawi, il popul che al vîf intal Sahara ocidentâl sot de ocupazion marochine armai di uns cuarante agns. Dongje di chescj argoments, si cîr daspò di dâ spazi aes minoarncis talianis, presentant lis lôr iniziativis, e a chês forestis. “Par dî il vêr lis situazions europanis plui cognossudis a son chês de Europe ocidentâl, sedi parcè che si cjatin une vore di informazions, sedi parcè che la rêt di contats e je ben inlidrisade. Cundut che il program al cîr di fevelâ ancje des minorancis de Europe dal Est, al è avonde dificil cjatâ notizis inzornadis e tes lenghis plui cognossudis. Dispès a son scritis intes lenghis de minorance e chest al compliche il lavôr di redazion che al è za pardabon lunc” al spieghe Carli Pup.
In spiete di vê Internazionalitari pal poadcast, si pues scoltâlu il martars a buinore ogni 15 dîs, di Fevrâr a Setembar, e il miercus daspomisdì in repliche. Cun di plui su www.internazionalitari.blogspot.com/ si puedin lei lis gnovis e lis trascrizions di cualchi pontade speciâl.
Volêso savêntint di plui su lis minorancis europeanis?
Alore o podês dâ un cuc a chescj sîts Internet:
• www.eurolang.net/
Agjenzie di stampe europeane
• http://ec.europa.eu/education/policies/lang/languages/langmin/langmin_it.html
Comission Europeane
• www.eblul.org/
Ufici European pes Lenghis Mancul Pandudis
• www.mercator-central.org/
Rêt di trê centris di ricercje
e documentazion su lis lenghis minorizadis
de Union Europeane
• www.eurominority.org/version/eng/
Portâl des Nazions Europeanis cence Stât
e des minorancis
• www.ecml.at/news/default.asp
Centri European pes Lenghis Modernis