TAL ETERE. Un gnûf apontament cul furlan par television

Di un cualchi di setemane e va in onde su Telemare, une piçule televison che e à la sede a Gurize, une gnove trasmission di informazion dute in lenghe furlane, condusude dal nestri colaboradôr Michele Calligaris.
Michele al presente une volte par setemane un spazi dut par furlan dulà che si vûl dâ vôs ae int e aes lôr opinions. Par cui che nol rivàs a viodi la emitent televisive gurizane – al è ancjemò cualchi problemut par ce che e rivuarde la cuvierture dal segnâl che a sperin di risolvi in curt – al pues cirî su Internet: di fat, dutis lis trasmissions si puedin ancje cjatâ sul cjanâl You Tube de emitent (www.youtube.com/telemaretv).
Par vê une cercje dai argoments tocjâts, fasìn un piçul struc des primis pontadis trasmetudis; inte prime, Michele al introdûs la trasmission e al fâs un sunt de storie de lenghe furlane, partint des primis testimoniancis dal vescul di Aquilee tal IV secul d.d.C., par rivâ fin ae ete moderne, cuntun voli particolâr ae storie dal furlan tal gurizan.
Te seconde pontade nus ven presentât il gnûf arcivescul di Gurize, cul so salût par furlan che al fâs ben sperâ, par passâ po al leam tra lenghis e sport e a altris gnovis dal teritori.
Te tierce pontade il formât si à slungjât fin a vincj minûts par presentâ daspò des gnovis de setemane il prin ospit de trasmission, Ferruccio Tassin, storic di Visc, che al presente la storie multiculturâl dal Arcivescovât di Gurize de sô nassite tal Sietcent in ca.
Te cuarte pontade, l’ospit al è Gigi Geromet, president dal Institût Achille Tellini, che si ocupe di ricercje e di promozion de lenghe furlane e che al presente cualchidune des iniziativis puartadis indevant dal institût.
Inte cuinte pontade, daspò des gnovis, o puedin viodi un approfondiment cun Isa Dorigo, president de Associazion Furlans dal Gurizan e intervistade ancje tal numar di Setambar de Patrie dal Friûl, che e conte cemût che e je nassude la idee di cheste socie e i siei proposits.
Par finî, inte seste pontade, trasmitude ai 16 di Novembar, il condutôr al vierç une biele discussion sul argoment dal plurilinguisim cul ospit Sandri Carrozzo, linguist e filolic, che al fâs un confront tra la situazion catalane e chê furlane su plui livei: culturâl, politic e chel de educazion, che al reste un dai plui impuartants pal avignî. Par concludi, si tabaie di varietâts dal furlan, par cirî di sclarî la confusion che si fâs su chest argoment.
La trasmission e je ancjemò a nivel sperimentâl, sei dal pont di viste tecnic che dai contignûts e duncje opinions e coments a son benvignûts. Par sigûr e je une iniziative une vore impuartante, parcè che il furlan par television al è simpri masse pôc, soredut par ce che al rivuarde il servizi public. Impuartant al è ancje il fat che cheste iniziative e rivedi dal Gurizan, un teritori dulà che purtrop il furlan al è sot atac, ma che in chest câs, par mert di une piçule television privade, al dimostre plui iniziative e voie di fâ rispiet al rest dal Friûl. ■
Andrea De Corte