Sfuei Mensîl Furlan Indipendent
Archivi de Patrie

LA FABRICHE DAI… LIBRIS – GNOVIS IN VETRINE. Cronichis di Saveri Senglar

............

Lis cronichis di Saveri Sengar, la opare di Franco Marchetta che e à vinçût il premi Sant Simon di Codroip dal an passât, e je rivade in librarie, publicade de cjase editore Forum, cun doi libris “Achì no ai viodût une pavee” e “Il numar 1089”.
I libris a fasin part di un progjet plui ampli, ancjemò daur davuelzisi, che al proviôt la publicazion di un tierç libri, forsit za l’an che al ven, di une schirie di contis che a an dât vite a des leturis publichis di Marchetta e Elvio Scruzzi, e di materiâl complementâr che al ven fûr sul sît internet dal autôr www.francomarchetta.net.
Tal cjapiel introdutîf dai libris cussì a vegnin descrivûts i protagoniscj des storiis:
“Saveri Sengar, un anticuari pacheôs che al à la buteghe in place San Jacum a Udin, e Arcjan Rinalt, un so amì, professôr di letaris in pension. Arcjan, malcuiet come pôcs, al stuzighe in continuazion Saveri cun stranis documents che ju sburtin ator pe Europe cirint di risolvi câs misteriôs cence vê nissune voie di fâlu e dispès riscjant di lassâi la ghirbe.”
In “Achì no ai viodût une pavee” la storie e zire intor di un dissen fat di une frute intal cjamp di concentrament di Terezin e cjatât par câs intal diari di un soldât furlan che al veve combatût cui austriacs inte bataie di Sadowa dal 1866.
Intal secont libri; “Il numar 1089” a jentrin in zûc i seviziis segrets britanics e une false di letare di Mazzini che puartaran i protagoniscj fin a cognossi Garibaldi.
L’espedient che al môf lis tramis e je la particolâr facoltât di Saveri Sengar che e fâs in mût che a voltis, cence volêlu, si sveedi intun altri puest e intun altri timp. In cheste maniere si passe di Linz a Norimbergge, di Praghe a Londre, dal votcent al dî di vuê, cun continuis riferiments leteraris che tant a plasin a Marchetta e cun numerosis citazions dal imagjinari furlan (Saveri moderni benandant?). Cussì si tocjin lis mil sfumaduris de culture europeane e lis lenghis de sôs diversitâts, dal yiddisch al todesc, dal talian al inglês. Dut chest par furlan e cuntun furlan che in maniere naturâl si rapuarte e si confronte.
Il fat di jessi in marilenghe al podarès jessi penalizant par une opare cussì condanantle a dinamichis di silenzi di bande dai media e de critiche uficiâi, o slontanantle dai letôrs potenziâi, ma in realtât propit il fat di jessi par furlan i dâ une molteplicitât di plans di leture in plui dulà che il confront fra identitât e globalitât al puarte a ducj respîr e insiorimint. ■
Maurizio Biasizzo

L'Editoriâl / Risierve di valôr

Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +

Salon Internazionâl dal Libri di Turin 2023

Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +

COROT. Nus à lassâts Sergio Salvi

Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +

Glesie Furlane / Grop amîs di pre Toni. Program dai events pal 2023

1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +