DIBATIT LETERARI. Cualchi segnâl positîf

La edizion dal 2012 dal Premi San Simon di Codroip e je stade vinçude, pal secont an di file, di Franco Marchetta cul romanç “U-“.
“Al è un libri” al à spiegât l’autôr dilunc de premiazion, “che al rapresente un omaç a la leterature in gjenerâl, ma soredut ai autôrs furlans modernis tant che Bartolini, Giacomini, Maldini, Maurensig, Tam e Morat, dulà che i personaçs si movin intun mont componût des tramis di ducj i romançs pussibii e a jentrin in contat cun altris personaçs leteraris.”
Carlo Tolazzi, president de jurie, al è someât plui content dai ultins agns disint che e je stade une edizion dal premi interessante cuntun alt numar di oparis presentadis, ben cutuardis, dulà che si è viodude ancje une buine partecipazion feminine cun cuatri autoris.  Il nivel al è stât di preseâ cun almancul un sîs o siet oparis che, par struture narative, lungjece e temis frontâts, a podevin confrontâsi cu la definizion di romanç. Al à ancje marcât, cun sodisfazion, il fat che lis tematichis sieltis dai concorints a an vût un respîr ampli e moderni, e, se e je vere che la opare vincidore e jere une cuarte parsore di chês altris, la cualitât in gjenerâl e je stade valide.
Al è masse adore par capî se e je passade la prognosi risiervade pe leterature furlane un trê agns indaûr propit dal San Simon, e ancje par capî se il ruspi e dolorôs dibatit che daspò si jere davuelzût al vedi puartât a alc di positîf e che al duredi tal timp. Dut câs chest an di Codroip, de jurie e des autoritâts presintis, no cate il contest esterni di sigûr dificil pe culture e pe lenghe furlane, a son stâts mandâts dai segnâi positîfs.
La motivazion dal premi cjapade dal verbâl de Jurie:
“Une storie ben postade te suaze di un Friûl e di une Mitteleurope che a partegnin ae nestre culture e ae nestre leterature. Une conte moderne là che il furlan si pant tant che une lenghe braurose di confrontâsi cul respîr de narative internazionâl. I nivei di leture a son plurôs e no cate il pês di citazions salacor cualchi volte di masse, la storie e cor vie cun sugjestions che nus fasin preseâ une tiere no su l’ôr de Italie, ma tal mieç de Europe”. ■
Maurizio Biasizzo