CJARGNE. Tribunâl di Tumieç: screade la struture destinade al… nuie

Chê di lunis ai 17 di Setembar dal 2012 e je stade une scree sot tancj aspiets pardabon particolâr e intun ciert sens uniche. Cirche 500 personis si son dadis apontament a Tumieç in place XX di Setembar tor lis cinc dopomisdì par inaugurâ une struture fantasime, par vie che che e jentre te liste dai 37 tribunâi che il Guvier Monti al à decidût, su pe cjarte, di sierâ.
Al tai dal nastri e mancjave dome Paola Severino, il Ministri de Justizie. Il sindic di Tumieç, risintût di chest, al à distès fat fente di vêle li devant e al à spiegade la storie dal Palaç di Justizie, ruvinât cul taramot dal ’76 e par chest ristruturât e metût a norme. “Al è stât il stes Ministeri di Justizie a fâ un mutui di 1 milion e 900 mil euros pes ristruturazions”, al conte. “Insieme cui finanziaments regjonâi e comunâi si è rivâts a une sissule di passe 4 milions di euros. Sierâ il Tribunâl di Tumieç cun 200 agns di storie aes spalis, nol sarà un sparagn di bêçs, anzit al volarà dî spindi 400 mil euros l’an dome pes trasfiertis dal personâl, cence contâ l’afit dai gnûfs locâi a Udin. La gnove struture tra pôc e restarà vueide, e lis spesis di gjestion e di manutenzion a saran a caric dai contribuents tumiecins”.
E intant che il sindic al spiegave par fîl e par segn dute la storie, une delegazion dal Comitât pal Tribunâl e je rivade adore di fevelâ cul Ministri Severino che si cjatave a Padue intune cunvigne su lis presons. Il Ministri e à dit che intes prossimis setemanis e cjaparà contats par vignî in Cjargne a viodi di persone la cuestion.
Intant, nissun al sta fer a spietâ il Ministri: un trop di int competente e sta lavorant sui ricors di presentâ ae Cort Costituzionâl e e va indenant la racuelte des firmis par une propueste di leç di iniziative popolâr.
Une struture gnove sierade prime di screâle, une robe cussì strane che di sigûr no je mai sucedude. La Cjargne si cjale ator… cuale saraie la prossime puarte che e vignarà sbatude in muse ai Cjargnei? ■
Marta Vezzi