DI BESSÔI – POLITICHE LINGUISTICHE. Cjalâsi ator par insedâ buinis pratichis

Jessi bogns di cjapâ a model chei altris nol vûl di copiâ, ma insedâ lis buinis pratichis che a àn vût sucès di altris bandis in contescj difarents. Zuan Frau lu à fat cul Olf, cuant che “in materie di politiche linguistiche nol jere nuie”.
Ce model veso sielzût in chê volte?
«O vin cjalât i esemplis di realtâts come la Catalogne e la Bretagne e o vin cirût di lâ a fâ intervents concrets e mirâts sedi sul “status” che sul “corpus” de lenghe, lant a slargjâ sedi lis situazions dulà fâ jentrâ il furlan che i imprescj par podêlu fevelâ in maniere “corete”, stant ancje la bisugne di introdusi in profonditât la grafie uficiâl. O vin fat duncje un plan precîs e organic di intervents che in pôcs agns nus àn fats deventâ, di imitatôrs che o jerin, un model par dutis ches altris minorancis linguistichis talianis, a partî dai sarts. La culture e je cussì: une circolazion di ideis che se a son buinis a vegnin par fuarce robadis, elaboradis e po pandudis intune altre maniere».
Trop impuartant saressial creâ une vere rêt des minorancis europeanis?
«Une vore, e no dome par resons ideâls. In dì di vuê, cu la crisi che nus scjafoie, i finanziaments dal Stât, des Regjons e dai comuns a calaran simpri di plui. Par rivâ a realizâ iniziativis di alt profîl no si pense mai ae Union Europeane. Alì si pues rivâ a vê finanziaments ma bisugne jessi in rêt. Alore ce spietìno a metisi dongje cun chei che a àn lis stessis nestris dibisugnis, i nestris stès problemis? Studiâ chestis tematichis insiemit e meti dongje progjets unitaris nus permetarès di continuâ a fâ azions di politiche linguistiche ancje se il Stât al fos cuintri».
E lis gnovis tecnologjiis? In ce rapuart àno di stâ cu la culture?
«La culture e à di doprâlis, no di ignorâlis. E à di jentrâ tai mieçs di comunicazion dulà che vuê i zovins e no dome a metin la plui part de lôr atenzion. Se la culture furlane no fos buine di travanâ tai smartphone o su facebook, al volarès dî che e je muarte. Ma i tentatîfs che a son stâts fats a dimostrin il contrari: mi impensi dal T9 par furlan presentât in Provincie di Udin o de Vichipedie par furlan, par no fevelâ dai sîts internet e des produzions musicâls e cinematografichis che a fevelin di une lenghe vive che no à nissune voie di disparî».
La prospetive digjitâl e je clare. Ma cemût mai la nestre Regjon ise plene di Museus? No saressie ore di sierândi un pôcs?
«I Museus a son simpri une robe positive se a clamin in vore la cressite di une identitât. Par chest a laressin afidâts aes comunitâts dai paîs che a varessin di autogestîju. In chest moment dispierdi une vore di risorsis par tignî viertis struturis cussì al deventarà un probleme finanziari no di pôc cont. Ma se la comunitât e vûl cjapâsi sù cheste cjame, la motivazion par fâ cressi chescj museus e sarà ancjemò plui penze e i visitatôrs in chê volte a saran di plui».
In ce rapuart stano vuê culture e economie?
«La sponsorizazion no cjale masse ae culture. Lis grandis aziendis e lis bancjis a poin grancj events, forsit. Ma la economie soredut no ten in nissun cont il furlan. In Catalogne par esempli la publicitât si fâs prin di dut in catalan. Achì invezit il reclam par furlan no lu fâs nissun: parcè?» ■
WALTER TOMADA