ESPERIENCIS. Leint la Peraule di Diu in Val Darzin

Il 12 di Avost, sot sere, o vin ancje nô let un toc di Vanzeli te glesie di S. Michêl in Vît (PN). E je stade une esperience uniche, no tant par vê partecipât ae inizitive imaniade dal plevan di Vît, pre Italico Josè Gerometta, si ben par jessi jentrâts tune amosfere spirituâl pardabon rare.
In prin lis peraulis dal Vanzeli che a vegnin letis nome a tocuts tai Vanzelis de domenie. In chest câs, invezit, la leture di ducj i vanzelis ti fasevin jentrâ te suaze de vite dal Crist su cheste tiere e ti fasevin capî miôr i events de sô vite e i insegnaments che al à dât tai pôcs agns che lu àn lassât tabaiâ ae sô int.
E po la leture a vôs alte, di front a lis personis che si cjatavin a jessi in glesie. Une robe e je lei a vôs basse il Vanzeli in cjase, une altre e je chê di comunicâ e spartî lis peraulis cun altris personis.
E po, ancje, il fat di lei il Vanzeli par furlan, te lenghe de mari al è une vore impuartant. Cuant che il predi lu leive par latin, intant de Messe no si capive nuie e inalore nol veve nissun savôr.   Al scugnive esplicâlu par talian, ma lu interpretave ancje e doncje no si jentrave tal spirt dal Vanzeli. Cuant che i plevans lu àn tacât a leilu par talian al jere bielzà diferent. Ma leilu par furlan, te tô lenghe, al à dut un altri valôr: al somee un scrit lassât par un popul che al vîf ta cheste nestre piçule part dal mont.
E infin il puest: daûr tu âs lis monts, denant si pant la plane. Dentri di cheste tiere cussì divierse, il glereâl di un flum che nol separe, ma che al unìs. Cuâl altri paisaç isal miôr?■
Guido Sut