150 agns fa e je stade concuistade la piche de mont Colians, la plui alte de Patrie

Vuê l’obietîf dai grancj scjaladôrs a son lis altis cimis des monts de Asie tant che l’Himalaya, ma un timp la sfide de “concuiste” des monts e jere in Europe.
Chest an si celebrin i 150 agns de prime assension de piche plui alte dal Friûl, il Colians (m. 2.780): almancul in maniere uficiâl, viodût che i cjaçadôrs e i pastôrs cjargnei, chê cime za le vevin scjalade.
Protagoniscj il grant esploradôr des Dolomitis, il vienês aristocratic Paul Grohmann, fondadôr dal circul alpin austriac, e un marangon e cjaçadôr di Culine, Niccolò Sottocorona.
Di chê volte, il Colians al è deventât un pont di riferiment pai escursioniscj che a puedin amirâ lis sôs bielecis e ricjecis gjeologjichis e botanichis. A son presints ancje cierts ripârs, tant che il Tolazzi e i Marinelli e la cjaminade e pues lâ indevant fasint une visite al lât Volaie sul confin italo austriac.
Intal stes an, e je stade ancje la prime assension dal Cervino (4.478 m): un an che duncje al à puartât ae concuiste de cime plui alte a ovest e chê plui a est dal arc alpin talian.
«Dispès – al à afermât Giulio Magrini, President de Associazion des sezions di mont dal Circul alpin talian  – si dismenteisi che il Colians e je la nestre mont plui alte, confondintle cu la Mont Cjanine o cul Mangart. Inte stesse maniere che il Triglav al è une istituzion pai slovens, o il Glossglockner pai austriacs e i carinzians, o volaressin che il Colians lu deventàs pai furlans».
Insume, al podarès deventâ, par ogni furlan, un vêr simbul e la mont che si à di lâ sù almancul une volte inte vite. ❚
✒Redazion