FURLANS, DIGJITAIT FURLAN. Arlef on line

La ARLeF (Agjenzie Regjonâl pe Lenghe Furlane) e à mitût online la gnove version de sô cjase su Internet, realizade de direWeb di Udin. Ae direzion www.arlef.it o cjatìn une da lis plui bielis vitrinis di lenghe e culture furlane viodudis fin cumò. Un sît pardabon sclet, dulà che si cognòs che la cure dai aspiets estetics e je stade aprofondide e dulà che i contignûts a son presentâts cun dinamicitât e cun sieltis cromatichis une vore frescjis che a restin tai voi. Il sît al è fûr par fûr bilengâl (furlan/talian) e al è simpri pussibil cambiâ la lenghe di visualizazion cence pierdi il troi da lis pagjinis visitadis. Ogni sezion e da il benvignût cuntune foto rapresentative, che e fâs incuriosî. Naturâl che a son presintis sezions di presentazion de Agjenzie, ma une vore di spazi al è lassât a la nestre marilenghe: no si fevele dome de sô storie e da lis tutelis, ma si vûl ancje tignî un voli su la condizion dal furlan jenfri lis altris minorancis europeanis, su la condizion sociolinguistiche, su la leterature, il teatri, il cine e vie indenant. O vin anche un puest pai comunicâts e pe rassegne stampe, pai documents de legjislazion, une bacheche pai bants e i avîs e par finì lis presentazions dai progjets dal Ent. La presentazion uficiâl e je stade fate ai 7 di Mai passâts a Udin cu la presince dal Assessôr regjonâl Elio De Anna, che al à volût difindi sei la Agjenzie, laudant so il gnûf statût, sei il puest che lis lenghis storichis de nestre regjon e àn di vê ancje in dì di vuê, jessint la fonde de nestre identitât. ■
Michele Calligaris