ATUALITÂT. Il rumôr dal fîl de schene

Il Tiliment, il flum “fîl de schene” dal Friûl, al è il protagonist di un cine documentari che al è stât presentât in anteprime furlane ai 29 di Novembar, li dal cine “Visionario” di Udin. “Rumore bianco” al è il titul di chest documentari poetic che i fâs onôr ae storie dal Tiliment, ae tiere che al travierse e ae sô int. Il cine al è scuasit dal dut par furlan, pal sempliç motîf che la “int dal Tiliment” e fevele cheste lenghe. La regjie e je di Alberto Fasulo, origjinari di Sant Vît al Tiliment, i produtôrs a son Paolo Benzi, Alessandro Rossetto e tancj dai atôrs che a partecipin. Chescj a rivin dai cuarante comuns su lis rivis dal flum che si son metûts adun intun Protocol di intese che al à permetût di inmaneâ cheste pelicule. “Rumore bianco” al nas di fat di une operazion artistiche e produtive cence precedents, motîf di braure par dute la regjon.
IL SUCÈS TALIAN_ Saludât al Festival dei Popoli di Florence di une sale plene di int e di tancj batimans, al sarà il prin film in lenghe furlane a sei distribuît intes salis cinematografichis a nivel statâl. Daspò de anteprime di Udin, al sarà proietât tai cjaf lûcs regjonâi – vâl a dî al Cinemazero di Pordenon, al Kinemax di Gurize e al Excelsior di Triest – par lâ duncje tes salis dai paîs sul ôr dal flum; intun secont moment si tentarà la distribuzion par dute la Italie. Il film al è une coproduzion taliane e svuizare che e cjape dentri FaberFilm, Wildside Media e RTSI Televisione Svizzera, in colaborazion cu la Cineteche dal Friûl. A distribuîlu e sarà la societât Tucker Film, nassude de union di Cinemazero e dal Centro Espressioni Cinematografiche (C.E.C.), pe convinzion di puartâ al cine “Rumore bianco” e di tacâ cussì une gnove ativitât di distribuzion e di produzion: moscjis blancjis tal panorame regjonâl che si inacuarç dai talents di chenti dome cuant che a vegnin celebrâts dai media talians.
TALENT STRASSÂT_ «Al displâs une vore che in Italie si strassin talents e professionalitâts, come che si viôt in chest film» e à dite di fat, cuntun pocje di polemiche, la produtore Luisella Realini de RTSI – Televisione Svizzera.
Unic piçul neu, il titul par talian. Come che al dîs Massimo Garlatti Costa, a pagjine 4, il furlan si preste un grum pai titui: magari si podeve doprâlu.
Dree Venier