CULTURE – I CLASSICS – 11. SANT JACUM, LÀ CHE AL FINÌS IL MONT

Cjapant la volte pe Catalogne…
Il nestri grup eclesiastic e culturâl al à simpri smicjât a peâ storie e religjon, fede e culture, cence miscliçaments fondamentaliscj e pericolôs, ma ancje cence cuintriposizions inutilis e no mancul pericolosis. Parcè che l’om al à plui dimensions, ma al è unitât. Par chel o vin metût tal nestri pelegrinaç, come prime tape in ordin di timp, la Catalogne. Soredut il Santuari monastic benedetin di Monserrat, cûr spirtuâl e culturâl de tiere e de storie catalane. Il nestri interès par une realtât di popul minoritari, fin a îr vonde similâr ae nestre, le vin cognossude midiant di Aureli Argemi, ex segretari dal abât di Monserrat e segretari e coordenadôr di dute la culture catalane tai siei rapuarts cu la Europe. Lu vin vût a fevelânus ancje a Riu Vert ai 13 di Setembar dal 1989, presince dal vescul, e i à fate tante impression che lu à clamât a Udin a fevelâur ai predis su religjon e culture e su la inculturazion de fede. La sô relazion su »Fede e lenghe» le vin publicade tal librut Minorancis e pâs. Duncje si cognossevin, e o pontavin fuart su di lui par che nus presentàs la realtât culturâl e eclesiastiche catalane e nus lassàs cucâ dentri tai segrets di Monserrat. Tante fiducie, e tant scombatiment telefonic e par fax di pre Laurinç, organizadôr dal pelegrinaç, e je stade mâl poiade e ripaiade. Di fat, in barbe a ogni sigurazion, prime nus à dit che al varès fat un salt a saludânus se al rivave a distrigâ une riunion e po nol à vude nancje la creance di dînus che nol vignive. Cussì nol à mostrade la sô ghigne e no nus à mandât un so amì o colaboradôr a compagnânus par une citât e une storie sigurementri grande. O ai concludût che nol baste jessi inteligjents par jessi educâts e che, se i grancj a son ducj compagns, i piçui deventâts grancj a àn premure di tirâ i retrats de prepotence. Une delusion masse grande par podêle dismenteâ. In pratiche, nus à ruvinât un viaç che al jere za scomençât mâl, par vie di un incident su la autostrade, che nus veve fat pierdi ogni coincidence e sbalâ ogni program. Ma chest intop al fâs part de vite e in fonts al è stât ancje positîf, parcè che nus à fat tocjâ cun man ce che e prove tante int ogni dì. Cu la difarence che nô o jerin sentâts comuts, in compagnie e o stevin lant ator e invezit tante int e scuen cori par resons di vore o di famee, cui bêçs e cul timp contât, magari cu la canaie in machine che e berghele di fam e di sium. Intant che si spietave di saltâ fûr di chest gredei, o ai vût mût di sintî cualchi coment moralistic di rude marcje clericâl, sul stamp di »Chest al è il presit che ti presente il progrès e il consumisim» o ben »L’implant industriâl e tecnologjic al è come la statue di Nabucodonosor, cui talons di arzile. Di fat baste un nuie par paralizâ dut». Considerazions ancje veris, ma nol è seri dî mâl dal progrès e dal consumisim propit biel che si lu dopre e che nus permet di fâ in pocjis oris un pelegrinaç che par vieri al domandave mês e agns e al meteve a riscli la vite. Ma il câs di Argemi, te sô vilanade, al è sigurementri piês dal incident che al à paralizade la autostrade. O varès une gole osteade di mandâi une letarate, ma se un nol capìs di bessôl cierts principis basilârs, nol gambie idee pal ultin plevan dal ultin paîs di chest puar Friûl. Cualchi volte o dîs, forsit par rassegnazion, che se deventant fuarts si devente malincreançâts e prepotents, salacor al è miôr restâ te nestre puaretât dignitose. Ma cirìn di alçâsi un pêl plui in alt.
pre Antoni Beline