La ultime edizion di pordenonelegge.it, la fieste dai libris cui autôrs, si è sierade cuntun grant sucès di public. Int di dute Italie, e ancje forescj, e à scuvierzût Pordenon par trê dîs, dai 19 ai 21 di Setembar. Innomenâts i ospits: di Alessandro Baricco a Carlo Lucarelli, di Fritjof Capra a Boris Pahor. Propit la presince dal scritôr sloven e pues jessi un precedent positîf par vê, tes edizions dal prossim an, plui autôrs furlans. Il festival naonian al è viert al mont, e cheste impostazion e je stade la fonde dal so sucès in chescj agns. Ma, dongje de presince ai premis Nobel pe leterature, si podarès incentivâ la produzion leterarie par furlan, massime te provincie di Pordenon. Tancj autôrs furlans a àn fevelât a pordenonelegge.it in chescj agns: di Carlo Sgorlon a Tullio Avoledo, par fâ cualchi non. Ma trops di lôr scrivevino par furlan?
AAA: O CIRÌN AUTÔRS FURLANS “POP”_ Pôcs, ancje parcè che, si à di dîlu, la bibliografie in marilenghe no je pal moment cussì siore e soredut di podêle “spindi” dal pont di viste comerciâl. E sarès ore di vê un autôr furlan plui “pop”: Pasolini al jere un grant, ma pai agns 2000 la promozion di une lenghe e passe ancje pe  comercializazion. Par chest motîf, il festival al podarès jessi une ocasion par fâ cressi une gnove leterature furlane, magari tignint di voli la blogosfere e dutis lis gnovis rêts di comunicazion. Propit la esperience de Patrie dal Friûl e mostre cemût che e sedi pussibile une gnove vision dal mont furlan, scrivint ancje di modernitât, di frontieris che si movin, di culturis che si messedin.
UN PRIN PAS_ Un dai moments plui biei de edizion 2008 al è stât la ultime dì te ostarie “La ferrata”, in bande dal municipi (chel di “Pordenone, veneta patria”, se o volês lâ a viodi la Patrie dal Setembar passât). Il circul culturâl Menocchio di Montreâl al à organizât une leture publiche di poesiis. La piçule ostarie e jere plene di int. Tra i plats di persut e lis tortis cul te, trê poetis a àn let lis lôr poesiis. Tra chescj, Pierluigi Cappello cun cualchi poesie scrite in marilenghe sul so paîs, Scluse. Un prin pas par rivâ a un spazi stabil dome pes poesiis e pes prosis par furlan?
NO DOME PE MARILENGHE_ Al podarès jessi un moment di cressite ancje pai dialets venits de bande meridionâl de provincie naoniane, cence dismenteâ todesc e sloven, o ben chês altris lenghis minoritariis de Regjon. O vin un an prime de prossime edizion, al è dut il timp par lavorâi parsore e par scomençâ a contâ di dut il caleidoscopi furlan.

Davide Francescutti