#Luminol: la realtât che a rivelin i media digjitâi

Par Mafe De Baggis «i media digjitâi a funzionin tant che il #Luminol, la sostance doprade de polizie sientifiche par rilevâ maglis di sanc e di licuits biologjics invisibii ai voi». Se Internet al è tant che il Luminol parcè che «al jude a pandi vizis, difiets, delits e compuartaments presints inte societât ma fin cumò invisibii», la prospetive teoriche che a chê De Baggis si opon in maniere vierte e je chê dal tecnodeterminisim.
◆ Parturît intai agns Sessante de Scuele di Toronto, cun figure centrâl il teoric des comunicazions sociâls Marshall McLuhan (1911–1980), il determinisim tecnologjic al è la idee che intune societât la struture mentâl des personis e la culture a sedin influençadis dal gjenar di tecnologjiis che cheste societât e à a disposizion. Cheste vision dai media e je riassumude inte formule celebre «il mieç al è il messaç». In particolâr, McLuhan al sosten che i media no son mai neutris sui contignûts che a veicolin, parcè che ogni strument gnûf no dome al perfezione la cualitât dal messaç ma lu modifiche.
◆ Mafe De Baggis e cjape lis distancis dal tecnodeterminisim par svicinâsi, plui o mancul in maniere cussiente, ai Cultural Studies, che a cjapin forme te Universitât di Birmingham intai agns Sessante. La part plui cognossude dai Studies e je forsit il model encoding-decoding proponût dal antropolic culturâl Stuart Hall (1932–2014), che al dîs che cualsisedi prodot mediâl al è il risultât di un procès di codifiche de bande dal autôr e di un procès di decodificazion de bande dal public, che al pues dâ al messaç almancul trê leturis: une leture egjemoniche dominante, che e tint a coincidi cu lis assegnazions di significât adotadis dal autôr; une leture negoziade, là che il letôr al met dongje interpretazions almancul in maniere parziâl autonomis; e une leture opositive li che il messaç, ancje se al è stât capît, al è let in mût antagonist.
◆ Se il tecnodeterminisim al pues fâ pierdi di viste la societât, come se lis tecnologjiis a operassin intal vueit, la oposizion formâl a cheste prospetive teoriche e pues puartâ a pensâ che lis tecnologjiis a sedin neutrâls, cemût che e sosten Mafe De Baggis: «i social media no son nuie cence chel che ur metìn dentri nô, e o sin nô a decidi ce fâ fâ a un ordenadôr».
◆ Si à duncje di visâsi de posizion dal professôr Massimiano Bucchi, sclaride intal saç “Io e Tech” recensît intal numar di Avost di chest gjornâl, che la idee che la tecnologjie e la inovazion a sedin neutrâls e je un dai lûcs comuns plui difondûts tra chei che a acompagnin la retoriche contemporanie. Il stes Bucchi, par dimostrânt la fragjilitât, al invide a jentrâ intune cjamare di albierc, a vuidâ une machine o a metisi in file intun ufici postâl: il segnâl che ti vise di meti la cinture di sigurece, il sisteme di gjestion des spietis in code, e la tessare magnetiche colegade al sisteme di iluminazion de stanzie di albierc, a vincolin l’utent a compuartâsi intun ciert mût. Si fevele in chest câs di “funzions che a oblein”.
◆ La idee di Internet tant che rilevadôr di fenomens sociâi, in part preesistents al Web, in part indipendents, e je il teme principâl dal libri, che dut câs al à dentri diviersis ispirazions interessantis, parturidis de ment di une professioniste che e vîf di tancj agns la Rêt. #Luminol, tant e tant, al va let cun lints critichis, se no altri pal fat che la sostance doprade de polizie sientifiche e à cualchi limit: di là dal sanc, ancje la varechine, la urine, i escrements e il cren a lescjin la luminessence de sostance chimiche. ❚