Suns Europe 2020, il belanç positîf di un festival speciâl che al ten bot cun cualitât

La edizion 2020 di Suns Europe, il festival des arts in lenghe minorizade che dal 2015 al puarte la Europe in Friûl e il Friûl in Europe tal non de diversitât linguistiche, dai dirits umans e de creativitât, si è sierade passe doi mês indaûr, ma si sint ancjemò il rivoc des vôs, dai sunôrs, des visions e des storiis che e à presentât al public di chenti vie pai mês di Avost e di Setembar stâts.
◆ E je stade une edizion speciâl, intune anade speciâl, cun cambiaments di struture e cun diviersis novitâts: la prime volte vie pal Istât; la prime volte cu la sezion musicâl cence il concors; la prime volte cuntune serade specifiche dedicade ae produzion musicâl furlane, Suns Friûl.
◆ «Il belanç di Suns Europe di chest an al è une vore positîf, considerant une schirie di aspiets», al è il  prin coment di Carli Pup, responsabil de redazion di Radio Onde Furlane e president de cooperative Informazione Friulana, che e inmanee la manifestazion cul jutori finanziari de Regjon Friûl-VJ e de ARLeF (Agjenzie Regjonâl pe Lenghe Furlane) e cu la poie e la colaborazion di diviers altris sogjets dal Friûl e dal rest de Europe. «Intune situazion complicade tant che chê di chest an, tra pandemie e confinaments, o vin cjapât sù la decision juste di fâ il festival vie pal Istât», al zonte, marcant daurman il prin «fondamentâl» risultât: «vê rivât a fâlu, dal vîf, cul public che al à vût cjapât part ai diviers apontaments di persone e no dome cjalantju vie internet, cemût che al è sucedût par altris manifestazions, e cun dute la int che i lavore daûr che e à podût lavorâ: une robe che in chescj timps no jere – e no je – par nuie sigure».
◆ Al è in cunvigne Leo Virgili, musicist, produtôr e diretôr artistic de manifestazion. «La situazion particolâr – al conte – nus à obleât a fâ cualchi esperiment. A àn funzionât ducj: de serade “clou”, là che cul scugnî lassâ in bande il concors des cjançons o vin vût mancul artiscj, ma par ducj al è stât il timp par fâ il lôr piçul conciert, ai events musicâi e leteraris inmaneâts ator pal Friûl, de Cjargne al Gurizan, cence dismenteâ la biele serade di Suns Friûl». «Pecjât pal brut timp che no nus à permetût di fâ il spetacul dai 30 di Avost denant dal cjistiel di Udin e nus à obleât a lâ a sotet tal Palamostre, dome cui prins dusinte di lôr che a vevin prenotât… », al ricuarde Pup, che adun cun Virgili al pant la sô sodisfazion ancje pe «rispueste dal public» e pe «cualitât dai contignûts», tra musiche, cine e leterature.
◆ Almancul une part di chei contignûts si pues tornâ a scoltâju su Onde Furlane, dentri di une gnove serie di trasmissions dal titul “Suns Europe 2020. Sclesis di Festival”. Vie pal mês di Novembar – la joibe, il vinars e almancul in part ancje la sabide a une e mieze dopo di misdì – sui 90 e sui 90.2 Mhz e su www.radioondefurlane.eu a saran, in plui pontadis, lis regjistrazions dal incuintri cu la scritore e opinioniste catalane Núria Cadenes e dai dialics di Angelo Floramo cul storic basc Joseba Asiron e cui musiciscj ocitans Sergio Berardo e Enrica Bruna dai Lou Dalfin, a scjavaç tra storie, atualitât, dirits, teritoris e identitâts.  ❚