Pescje in crisi a Grau e a Maran

Tai ultims dîs agns, il compart
al à regjistrade une contrazion pesante,
cu la riduzion dal numar des barcjis,
de cuantitât di pes cjapât e ancje dal faturât
Esistie ancjemò la pescje in Friûl? A lâ daûr dal contignût dal Report resint compilât dal Osservatori Socioeconomic de Pescje e de Acuiculture di Veneto Agricoltura, la rispueste e sarès pardabon negative. Almancul par ce che al tocje dôs des marinis principâls in regjon: Grau e Maran. Si trate di realtâts economichis che si caraterizin, in plui che pe pescje maritime normâl, ancje pes ativitâts di arlevament dai moluscs e dai pes, praticadis in lagune e tes vals di pescje. Ve chi i numars che a fotografin l’andament “neri” dal periodi 2010-2019.
◆ La flote maritime di Grau e je fate di 124 imbarcazions, in câl dal 20,5% tai ultins dîs agns; la flote di Maran, che vuê e conte 178 barcjis, si è invezit ridusude dal 22,9%. Lant indevant cussì, ancje lis barcjis sieltis a son deventadis simpri plui piçulis e cun motôrs mancul potents. E il numar des impresis al è calât.
◆ Chês ativis inte filiere dal pes a Grau a risultin 110 (-18,5% a pet dal 2010), cuntune preminence di chês di produzion primarie. Stes discors al vâl pes aziendis dal compart itic di Maran che vuê a son cirche 230 (-13,5% in confront di dîs agns fa).
Numars a niçul invezit par ce che al tocje la ocupazion, stant che a Grau chei che a lavorin tal compart a son vuê 154, cifre che e segne un -3,1% a pet di dîs agns fa; invezit a Maran, lis 406 unitâts lavorativis censidis cumò a segnin une incressite dal 6,3% in confront cul 2010. Sui marcjâts di Grau e Maran a rivin dongje i prodots itics tipics de aree Nord dal Mâr Adriatic, ma ancje une cuote impuartante di pes di val. Il grues de produzion al è rapresentât, però, dai moluscs e di altris tipologjiis itichis che no son di pes turchin. L’andament al è une vore negatîf in merit ae produzion pescjade. Sul marcjât di Grau, lis 139 toneladis rilevadis tal 2019 a segnin une diminuzion dal 73,7% a pet dal 2010, cul faturât in câl dal 63,8% (1,1 milions di euros). Pal marcjât di Maran, la situazion no je tant miôr, cuntun cuantitatîf di 763 toneladis cirche, in câl dal 53,9%. I incàs a tegnin di plui (-18,5% rispiet al 2010, par 4,8 milions di euros).
◆ Tra Maran e Cjarlins, a son siet lis vals ativis che a cuvierzin une aree totâl di 250 etars: trê di chês a son ancjemò produtivis, cuntune densitât fisse di arlevament e cu la soministrazion regolâr di mangjative ai pes. Invezit, inte lagune di Grau lis vals a son 40, suntune aree totâl di 1.400 etars: undis a son ancjemò produtivis. Lis vals a son in medie di dimensions plui fissis che no a Maran, e lis varietâts plui arlevadis a son orade, brancin, diviersis speciis di cieui e agundelis. Cun di plui, a son vals là che si dedichin ancjemò al arlevament tradizionâl dal bisat, e dôs areis di sperimentazion de culture di gjambarons e ombrinis. ❚