Il profîl

Nassude intal 1971 a Udin, Cristina Noacco e insegne leterature medievâl francese te Universitât Jean Jaurès di Tolose e a Albi tant che maître de conférences,ven a stâi docente associade. Ogni an, par une setemane, e fâs lezion ai students di lenghis de Universitât di Udin.
◆ Di là dal dedicâsi al insegnament e ae ricercje, e coltive cun passion la scriture, ma ancje la fotografie e il dissen che i permetin di selezionâ e di fâ jentrâ tal so mont «armonie, bielece e ecuilibri».
◆ E à voltât par talian il romanç Erec e Enide di Chrétien di Troyes(Luni, 1999), premi di traduzion Leone Traverso Opera Prima, e la conte cortesane Piramo e Tisbe(Carocci, 2005).
E nudrìs un amôr profont pe nature, che e frecuente, a pît e in bici, cun spirt contemplatîf.
◆ Viazadore apassionade, e à scrit des sôs esperiencis tai puescj plui diferents: dal Maroc ae Corsiche, passant pal Himalaya.
◆ E à publicât, par Kappa Vu,lis racueltis di tescj in furlan e talian Morâr di amôr. Albero d’amore(2015),Sfueis di amôr. Fogli d’amore (2016), e Faliscjis. Storiis di fûc e di fum – Faville. Storie di fuoco e di fumo (2019).
◆ Dal viaç su lis dôs ruedis dilunc dal Tiliment al è nassût il so ultin volum, I segreti del Tagliamento, publicât chest an di Ediciclo. ❚