Otave pontade. Autonomie come categorie spirituâl

Stant che pre Checo al proponeve il model dal Patriarcjât, tancj lu criticavin di volê tornâ a meti impins un stât teocratic, aromai fûr dal timp. In realtât, pre Checo sul plan politic al imagjinave plui un partît sul stamp de Volskspartei sudtirolês; il Patriarcjât invezit lu viodeve tant che model di glesie universâl, diversificade, inseride intun teritori cu lis varietâts, ricjecis culturâls e storichis che ogni lûc al puarte cun se.
pre Roman Michelot
Il nestri popul, dutune cui popui confinants, al à une altre peculiaritât par solit tasude, sbeleade e rimovude: la nestre risultive religjose e culturâl aquileiese. Pre Checo al è stât il grant cjantôr di Aquilee e di dut ce che chest non plen di significât al compuarte. Mi riferìs ae idee e ae realtât dal patriarcjât tant che fat teologjic, liturgjic, eclesiâl, politic e aministratîf, cun dutis lis bielis perlis che nus vegnin regaladis de ricercje inteligjente e passionade di Josef Vale, di Guglielmo Biasutti e, in chescj ultins agns, des intuizions e sugjestions di Gjilbert Pressac.
◆ Cheste peculiaritât e à di jessi ricognossude dal stât e de glesie, pe part specifiche che ur spiete. Ma, centraliscj e autoritaris come che a son, no molaran par mai, ancje pal fat che, a diference des minorancis fuartis e ricatadoris dai todescs e dai francês e di une part dai slovens, nô no podin fâ nissune pôre. O sin piçui, o sin cence santui, no vin nissune fuarce di ricat o di imposizion, o sin intune posizion gjeografiche disgraciade e intune situazion economiche disastrade, e duncje o vin pocjis sperancis. A pat che i furlans no si rindin cont di vê une storie, une muse, une anime, un puest inte famee dai popui e no si metin di impegn, pe prime volte, par vê, par amôr o par fuarce, ce che a àn dirit par nature.
◆ I romans, mestris di carognetât e ancje di furbetât, a disevin “Nihil volitum, quin praecognitum”. No si pues volê, no si pues batisi, no si pues pierdi timp e bêçs e salût par une robe che no si le cognòs. No si pues difindi un tesaur se no si sa che al è un tesaur. Tant plui cuant che ducj, a scuele e in glesie e in ogni ocasion, ti disin o ti fasin capî in mil manieris, une plui disgraciade di chê altre, che si trate di un disvalôr, di une pecje e no di une marcje di fabriche, di une limitazion e no di une oportunitât, di un mâl di liberâsi come i pedoi e la miserie, e no di un ben che ti da il gust e la reson di vivi.
◆ In cheste vore di cussientizazion, pre Checo al è stât mestri mirabil. Al è il prin che, almancul a mi, mi à dit e mi à mostrât cu la sô vite la bielece di jessi furlans, la ricjece de nestre storie, la poesie e la armonie de nestre lenghe, la diference fra preâ par furlan e par talian. Al è il prin che nus à fats tignî in bon di jessi ce che o sin.
◆ Prime di cognossilu, di scoltâlu, di frecuentâlu, ancje jo o preavi, o resonavi, o scrivevi par talian e o varès baratât dut il gno mont culturâl e spirituâl par cualsisedi modernitât o banalitât taliane o americane. Come che a àn fat i indians cul aur che lu scambiavin par un toc spieli, o la nestre int cui cjaldîrs di ram par un seglot di plastiche, o cul lôr patrimoni di sapience svendût par cuatri piuladis plui o mancul siguris par talian. No podìn inrabiâsi cui gjenitôrs e cui nonos che a talianin cui fîs e cui nevôts se nissun no ur à insegnât il valôr straordenari di ce che a butin vie e il dam ireparabil di pierdi la proprie lenghe, culture, muse, anime. ❚