La Val Tramontine, li che e vîf e che e lavore Giulia Piazza, al è un teritori siôr, cun tantis particolaritâts, ma che, ben prime dal Covid-19, al paie cjâr i efiets dai tais continuis ai servizis e dal dispopolament. E pûr, nol è dut pierdût. La strade di cjapâ par une sô rivitalizazion e je za segnade e «plui di cualchidun, ancje jo, al è daûr a cjapâle o lu à za fat - e dîs Giulia -. E je stade creade di personis che, cun pazience, a àn lavorât une dì daûr di chê altre prime par disdoganâ il prejudizi che la mont e je un puest di sieradure e di isolament, e po dopo par meti dongje un tiessût sociâl fuart fat di comunitât, condivision e acet. Se e je la volontât de bande di chei che a vivin za in chescj lûcs, di mantignîju in vite, alore si pues cjatâ il mût di valorizâ chês particolaritâts par atrai turiscj, si pues cirî di tirâ fûr finanziaments par tornâ a meti in pîts i servizis che a mancjin, e in cheste maniere creâ gnovis oportunitâts e clamâ dongje gnovis personis. E dimostrâ ancje a chei plui zovins che, forsit, intun paisut di mont tu puedis cjatâ tant di plui che intune grande citât».
◆ A dâ l’esempli al è propit Tramonç Disot, dulà che «e je stade vierte une buteghe di alimentârs propit dilunc de cuarantene e la Pro Loco dal puest e je stade une des pocjis in regjon a organizâ ativitâts e iniziativis dilunc dal Istât, tra chestis il FESTinVAL che in dome dôs setemanis al è stât tornât a pensâ par rispietâ lis normativis par fâi cuintri al Covid. Un paîs - e zonte Giulia - che, in graciis di fonts regjonâi, al è rivât a vierzi a mancul di un mês de fin de cuarantene, un piçul pont di informazion par dâur acet, e dutis lis informazions che a àn bisugne, aes personis che a rivin inte val». ❚

E.A.