Rocui, un patrimoni furlan te memorie di Pre Checo

Il rocul di Pre Checo Placerean a Montenârs al deventarà un parc leterari dedicât propit al storic plevan autonomist dal piçul paîs prealpin. Il recupar dai rocui cun finalitât turistiche e di promozion dal teritori al è un dai tancj progjets che l’Ecomuseu des aghis dal Glemonàs al sta puartant indenant. A Montenârs, une volte a jerin passe 60 rocui che lis fameis a dopravin par cjapâ i ucieluts e tirâ indenant la economie familiâr. In dì di vuê, a son passâts sù par jù 20 agns de leç che e à vietât chê pratiche e di rocui a ‘nd è restâts dome cuatri: chel di Manganel, chel di Spizzo, chel dal Puestin e chel di Pre Checo. Par valorizâju, l’Ecomuseu al à pensât ben di metiju in rêt midiant di un percors che ju coleghi, e a ognidun i à assegnât un rûl precîs: cussì, se chel di Pre Checo al devente un parc leterari dedicât aes sôs oparis, chel di Spizzo al deventarà un pont di osservazion de faune dulà che si podarà ancje restâ a durmî, chel di Manganel al varà un rûl museâl cu la pussibilitât di visionâ i imprescj di une volte, e chel dal Puestin al deventarà une ostarie tal viert de nature, gjestide de Pro Loco, in ocasion des fiestis. «O vin tacât chest percors di valorizazion dai rocui – e conte Etelca Ridolfo dal Ecomuseu – tal 2007, midiant un contribût de Union Europeane che o vin doprât par puartâ indenant un ricercje storiche e etnografiche cul coinvolziment de popolazion. In dì di vuê a son tantis lis personis apassionadis di ambient e di nature che a vegnin a visitâju.
◆ Il lavôr che o vin fat al à coventât a gjavâi ai rocui che nomee di “lûcs di muart” par deventâ paisaç cu lis sôs olmis antropichis di visitâ. E po, disìnlu: ancje Pre Checo nol leve tal so rocul dome pai ucieluts, ma ancje par puartâ indenant lis sôs leturis te pâs dal bosc». Si sa che i rocui une volte a coventavin par copâ i ucieluts, une pratiche che vuê e je vietade ma ancje condanade in gracie de plui alte sensibilitât sul teme dal rispiet de nature dal mont di vuê. Pal Ecomuseu, chest nol à volût dî che si veve di scancelâ dut, ma al jere impuartant mantignî une testemoneance dal passât furlan. Chest an, par vie de emergjence no si à fat la fieste dai rocui inmaneade de Pro Loco, ma l’Ecomuseu al organize concierts in chei lûcs, in particolâr tai rocui di Spizzo e di Pre Checo: ai 21 di Jugn al à sunât il grup glemonat dai “Parcè no?”, ae fin di Lui e je stade la volte di un grup rosean, in Avost si fasarà musiche classiche, e in Setembar e je in program la esibizion di un grup ocitan, in colaborazion cul Ecomuseu di Val Stura. «I rocui a son un patrimoni de comunitât di Montenârs – e spieghe Etelca Ridolfo -, e il patrimoni no si bute mai vie. Tai agns o vin ancje cirût di rindi i rocui ponts di osservazion de avifaune pai ricercjadôrs, ma la posizion no jere avonde buine. Cumò o lin indenant cul progjet indreçât a metiju in rêt, cu la poie e cu la colaborazion dal Comun. Dal sigûr, vê bandonade la coparie di ucieluts e vê cjatât gnovis formis par doprâju, al è stât un grant pas culturâl par ducj». (p.c.)  ❚