E je stade une esperience che no finìs cussì cemût che e je tacade, cuasi par câs. E je stade une aventure che e à cjatât tante int interessade tal riviodi la nestre storie, la nestre art, intune muse mai imagjinade prime. Nuie di inventât, dut al è bielzà stât fat. Ma met il voli in linie cun diviersis prospetivis, nus fâ ben vulintîr riscuvierzi patrimonis che forsit no si saveve nancje di vê. O stoi disint de esperience “O viôt musiche in Friûl”, une videorubriche che o ai fat e curât e che si pues cjatâ su youtube scrivint il titul par talian. Un viaç tra musiche e art figurative che e nus à puartât a osservâ di dongje oparis unichis tra pituris, frescs, mosaics, statuis, miniaturis e tant altri; par manufats di epoche antighe, si va dal cuart al decim otâf secul, indulà che i sogjets rapresentâts, tra sacri e profan, a fasin musiche, a àn un strument in man, a cjantin, a balin. La dissipline si clame iconografie musicâl, e o soi cetant content di vê puartade cheste riscuvierte inte nestre tiere. Parcè che il Friûl al è plen di oparis di art indulà che la musiche e je protagoniste, cun pitôrs de nestre tiere, o che a àn vivût chi di nô, tant che il Tiepolo, Antonio de’ Sacchis dit “il Pordenon”, Gianfranco del Zotto dit “di Tumieç”, Antonio Schiavi, Giuseppe Martini, Giulio Quaglio, Pomponio Amalteo e tancj altris, che a àn dât une clâf di leture de nestre identitât no dome cu la piture, ma cu la piture miscliçade ae musiche. Une grande ereditât.
◆ La videorubriche “O viôt musiche in Friûl”, che si pues viodi digjitant il titul su internet, nus à puartât in dîs localitâts dal nestri Friûl: Udin, par viodi i segrets musicâi des statuis di Florean e Venturin in Place Libertât; Pontêbe, par pierdisi intal Flügelaltar de glesie di Sante Marie; Pordenon, par viodi il de’ Sacchis e il di Tumieç a confront tra palis di altâr cun sogjets musicâi. Daspò Aquilee, par amirâ i mosaics de Basiliche e il teme dal “Bon pastôr” che al sune un flaut; Tumieç, tal Domo di Sant Martin pai frescs di Schiavi cuntune orchestre dissegnade; Cividât, par viodi di dongje une miniature di Salteri di Egbert dal decim secul. Inmò, a Paulâr inte cjase museu “La Mozartine”, par studiâ la grande ereditât che nus à lassât il compositôr e studiôs Giovanni Canciani; a Codroip, li de dite organarie “Zanin” che e fabriche struments in dut il mont, ospitâts dal grant Gustavo Zanin; a Gurize, par viodi un afresc dal Rinassiment intal Domo. E infin, tornat a Udin, indulà che e si à tacât, par viodi une lunete conservade intes Galariis di art antighe de citât. Il Friûl al è vêr e ancje dissegnât, piturât, sculpît, sunât, cjantât. Scuviertis di vivi e di rivivi, patrimonis di jessi ben braurôs. ❚
