Ason slungjâts fin ai 31 di Lui i tiermins par partecipâ ae tierce edizion dal premi “Fondazione Friuli”, inmaneât ancje chest an in colaborazion tra la Fondazione Friuli e la associazion Friuli Storia. La fondazion e à decidût di spostâ indenant i tiermins par dâur la pussibilitât ai zovins di fâ riferiment aes bibliotechis che a jerins stadis sieradis par diviers timp par vie de emergjence.

◆ L’obietîf dal premi al è chel di comunicâ ai zovins il gust pal passât cun gnovis formis in vore di chest an. Cun cheste edizion a saran di fat assegnâts doi ricognossiments: il prin, di 500 euros, par un elaborât di ricercje storiche tra lis 15 mil e lis 30 mil batudis, cun notis, bibliografie e in câs documents alegâts. Il secont premi al sarà par un lavôr che al vedi tant che teme la storie dal vincjesim secul o la sô memorie. A chest secont ricognossiment si podarà partecipâ cuntune foto, cuntun servizi fotografic (massime 15 imagjins), un video (massime 15 minûts) o un altri prodot artistic o multimediâl. Il premi al è indreçât ai students des scuelis superiôrs des provinciis di Udin e di Pordenon. A son ametûts sedi lavôrs dedicâts a argoments specifics di storie, che lavôrs dedicâts plui in gjenerâl al significât dal passât o aes conessions jenfri passât e presint. Il lavôr al varà di jessi inviât midiant dal modul specific in rêt sul sît www.friulistoria.it dentri dai 31 di lui. La consegne dai lavôrs che a pesin plui di 5 megabyte o che no puedin jessi trasmetûts in formât eletronic e pues jessi predisponude cjapant acuardis vie pueste eletroniche scrivint a segreteria@friulistoria.it. Finît il concors, ducj i lavôrs a saran tornâts ai proprietaris. La jurie e sierarà i siei lavôrs dentri dai 31 di Avost e la premiazion e vignarà fate a Udin intune cu la cerimonie di premiazion dal premi talian di storie contemporanie Friuli Storia.❚

Piero Cargnelutti