Silvia San Marco, nassude a Udin tal 1981, dopo de lauree in Siencis internazionâls e diplomatichis ae Universitât di Triest, e met dongje une schirie di esperiencis formativis e professionâls in Italie e tal forest. Tra chestis, un master in racuelte fonts, marketing e comunicazion tes organizazions non profit; a Sarajevo, in Bosgne, e lavore pal Ufici di cooperazion taliane li de Ambassade de Italie; a Rome, li dal Coleç de difese de Nato e pe organizazion no governative Asia onlus, fin che – «no sai nancje jo cemût», e conte – il so curriculum al rive ae Organizazion des Nazions Unidis pe alimentazion e la agriculture – Fao. «Mi àn clamade par fâ un colocui. Doi dîs dopo, o varès vût di partî par Montecarlo, li che o vevi cjatât lavôr. O vevi za fatis lis valîs. No soi mai partide. A son passe 10 agns che o lavori pe Fao».
Silvia, che e vîf a Rome dal 2005, pûr cun diviers periodis di permanence tal forest, e à lassât il Friûl dopo de lauree. «O ai imparât a preseâlu cuant che o soi lade vie». ❚ (E.A.)