Sfuei Mensîl Furlan Indipendent
Archivi de Patrie

Federico Morocutti e la sô Radio Tausia

Marta Vezzi

Il meracul di une web radio
che e trasmet 24 oris in dì
di un paîs di 50 abitants

Intune piçule frazion dal Comun di Trep di Cjargne, Tausie, indulà che a vivin, pôc su pôc jù, 50 animis, e esist une web radio che di cualchi an e trasmet 24 oris su 24, 7 dîs su 7, buine musiche e une buine cerce di programs leâts ancje al teritori cjargnel.
◆ Dut al nas tal 2014: Federico Morocutti, che al veve 14 agns, al condivît insiemi cuntun grup di amîs la passion pe radio e in particolâr pe web radio. Chê, e jere la novitât di chel periodi, o ben stazions radiofonichis che si puedin sintî vie internet cuntun ‘clic’. Federico de idee al passe ai fats, e sul finî di Setembar dal 2014, al mande in onde la prime direte di Radio Tausia trasmetint… de sô  cjamare! «Un computer e un microfon e – al conte Federico – i vin metût in onde un pâr di cjançons dal moment. O sin partîts jo e Evan Bortolotti, e dopo si è zontât Jonni Moro. Radio Tausia vuê e à 10 colaboradôrs, massime zovins, ma a son ancje personis che àn fat radio tancj agns fa e che cumò a àn ricjapade la vecje passion».
◆ Dopo la prime direte, a ‘nd è stadis altris fin tal 2015, e po dopo une polse fin tal 2016. Ai 19 di Març di chel an, Radio Tausia e je tornade a lâ in onde 2, 3 voltis par setemane, fin tal Dicembar dal 2018. Cul Zenâr dal 2019 e je començade la trasmission 24 oris su 24; i programs a son incentrâts pal plui sul teritori e su pe culture, dal cine ae cusine, de atualitât ae musiche.
◆ Cualchi esempli: ogni domenie, des 3 aes 4 dopomisdì, si pues scoltâ la classifiche uficiâl de Radio “CiaoMandiCompilation”, cun Chicco Sound e Nik Pradu; dal lunis al vinars, des 7 aes 8 di buinore, si da il bundì cun “Il buongiorno si sente dalla Radio”, cun Chicco Sound. E vie indevant.
Radio Tausia si pues scoltâ in dut il mont, baste vê un colegament internet!
◆ «Principalmentri – al conte Federico – e je scoltade in dute Italie, ma o vin ancje colegaments de Svuizare, France, Gjermanie e Canadà. Par ce che al tocje lis scoltis, tal 2019 o fin fat 60 mil colegaments, un risultât che no si spietavin! Tal 2020 o vin vût inmò un aument, 15 mil dome tal mês di Zenâr, 23 mil tal mês di Fevrâr e 32 mil tal mês di Març. Al è biel viodi che tante int nus da supuart, scoltant ce che o proponìn in radio.»
◆ Dal sigûr, la passion e l’impegn no bastin. Di fat, Federico al dîs: «I coscj a son tancj, tra licencis, musiche, strumentazion. La radio par cumò e je sostignude massime dai colaboradôrs che si  autofinanziin. O ricevìn ancje ogni an un contribût dal Comun di Liussûl. Al podarà deventâ un lavôr a ducj i efiets, ma prime al tocje lavorâ e miorâ al 100% il progjet. Planc planchin, se i crodìn, je fasarìn! Mai molâ!»
◆ Federico al à buine volontât e in merit al doman al crôt che «al tocje lavorâ inmò tant: i risultâts a rivin ma o podìn fâ inmò miôr, no son limits. I vûl tante fantasie e voie di fâ e mai fermâsi, ancje se a son un grum di ostacui».
◆ Par savê inmò alc di plui e par sintî la direte, al baste clicâ su https://radiotausia.it/, la radio che di un piçul paisut de Cjargne si vierç a dut il mont. ❚

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +